Шаҳзода Гаррининг рафиқаси Меган Марклнинг отаси Томас Маркл қизининг Опра Уинфри билан суҳбатда айтган гапларига изоҳ берди. У бу ҳақда тонгги Good Morning Britain кўрсатувида гапирди, деб хабар беради «Korrespondent.net».
Қайд этилишича, Томас Маркл эшитган гаплари ҳақидаги таассуротларини жамоатчиликка етказиш истагини шахсан ўзи билдирган.
«Мен қизимнинг Опра Уинфри билан суҳбатидан қаттиқ хафа бўлдим. Гарри ва Меган жуда оғир бир дамда қироллик оиласига кучли зарба берди», — деди у. Томаснинг айтишича, ушбу интервью ҳеч бўлмаганда 99 ёшли шаҳзода Филипп тузалиб кетгунга қадар намойиш этилмаслиги керак эди.
Меганнинг психологик муаммолар ҳақида ўйлаб топган гаплари отасини ўзининг тарафига оғдира олмади. Томас монархларни қўллаб-қувватлашда давом этади. Герцогинянинг отаси қизига қирол оиласидан ҳеч қандай босим ўтказилмаганига амин ва унинг фикрича, ирқчилик ҳақидаги гаплар жиддий эмас.
«Мен инглизларни ирқчи деб ўйламайман. Арчининг танаси ранги ҳақидаги суҳбат эса аҳмоқона саволдан иборат бўлган бўлса керак. Мен ҳар доим қизимни яхши кўриб келганман, бундан кейин ҳам яхши кўраман» — таъкидлади Томас Маркл.
Ўз навбатида, Томас Маркл икки йил олдин қизини айблаб интервью бергани учун юз марталаб кечирим сўраганини, аммо бунинг эвазига на қизи ва на куёвидан ҳеч қандай жавоб олмаганини айтди. Томаснинг сўзларига кўра, у журналистлар билан фақат Меган уни кечириши учун мулоқот қилади ва қизи кечириши билан Томас ОАВга изоҳ беришни тўхтатади.
Эслатиб ўтамиз, Британия шаҳзодаси Гарри ва унинг рафиқаси Меган Маркл америкалик машҳур телебошловчи Опра Уинфрига интервью берди. Интервью Тошкент вақти билан 8 мартга ўтар кечаси Американинг CBS телеканалида, 9 мартга ўтар кечаси Британиянинг ITV телеканалида намойиш қилинди. Норасмий маълумотларга кўра, ушбу каналлар интервьюнинг трансляцияси ҳуқуқи учун камида 8,4 миллион доллар тўлаган. Аммо харажатлар ўрни аллақачон қопланган бўлиши мумкин, чунки трансляция АҚШда 17 миллион кишини, Буюк Британияда 12 миллион кишини экран қаршисига «михлаган». Шаҳзода Гарри ва рафиқаси Марклнинг интервьюси шов-шувга айланиб, айни пайтда бутун дунёда муҳокама қилинмоқда. Елизавета II эса набирасининг интервьюсига баҳо бериш учун бироз вақт кераклигини айтган.
Изоҳ (0)