Дунёда ўтган бир кеча-кундузда юз берган коронавирус билан боғлиқ энг муҳим янгиликлар билан «Дарё» коронадайжестида танишинг.
Қайси мамлакатлар локдаун эълон қилди?
Эстонияда 11 мартдан ҳукумат томонидан жорий қилинган қатъий чекловлар кучга кирди, улар коронавирус инфекциясининг «британча» штамми тарқалишининг олдини олишга қаратилган. Локдаун бир ой муддатга — 11 апрелгача киритилмоқда. Унинг доирасида ўқув муассасалари масофавий режимга ўтказилади, ота-оналарга кучли зарурат бўлмаса, болаларини боғчаларга олиб бориш тавсия этилмайди. Фуқаролар кўчада камида икки метрлик масофани сақлаган ҳолда, кўпи билан икки киши бўлиб юриши мумкин. Энг зарур маҳсулотлар сотиладиган дўконлардан бошқалари ёпилади. Умумий овқатланиш муассасалари, спорт заллари, бассейнлар ва кўнгилочар муассасалар ҳам ёпилади.Шунингдек, Шарқий Африкадаги орол давлат — Маврикийда ҳам COVID-19’га чалиниш ҳолатлари кўпайгани туфайли локдаун эълон қилинди ва 25 мартга қадар халқаро рейсларни қабул қилиш тақиқланди. Локдаунга мамлакатнинг турли нуқталарида коронавирус билан касалланган тўрт кишининг аниқланиши сабаб бўлган. 9 мартга келиб, беморлар сони 15 кишига етган. 10 мартдан 25 мартга қадар фақат асосий хизматлар, шу жумладан, порт, аэропорт, касалхона ва шошилинч ёрдам хизматлари ишлайди. Супермаркет, новвойхона, дорихона ва АЁҚШлар чекланган режимда фаолият юритади. Маврикий — дам олиш учун қимматбаҳо йўналиш бўлиб, у ерга асосан бадавлат сайёҳлар ташриф буюради. 2021 йил январи охирида мамлакат ҳукумати эмланган сайёҳлар икки ҳафталик карантинсиз киритилишини эълон қилган эди.
«Британча» штамм 64 фоизга кўпроқ ўлим келтириши аниқланди
Кўплаб мамлакатларда локдаун киритилишига сабабчи бўлаётган «британча» штамм коронавируснинг аввалги штаммларига нисбатан 64 фоизга кўпроқ ўлимга олиб келиши аниқланди. Ekseter университети тадқиқотчилари октябрь ва январь оралиғида коронавирус аниқланган тахминан 55 минг жуфт иштирокчиларнинг маълумотларини таққослаб чиқди ва уларни 28 кун давомида кузатди. Коронавируснинг янги вариант билан касалланганлар учун ҳолатнинг ўлим билан тугаши эҳтимоли 64 фоизга юқорироқ бўлиб чиқди. Хусусан, ўлим даражаси ҳар 1000 та ҳолатга 2,5 дан 4,1 гача ошди.Туризмни қайта тиклаш учун амалга оширилаётган чоралар
Испания ҳукумати COVID-паспортлар — коронавирусга қарши эмланганлар учун электрон ҳужжатлар тизимини иложи борича тезроқ жорий қилиш устида ишламоқда. Мамлакат саноат, савдо ва туризм вазири Мария Рейес Маротонинг айтишича, бу баҳор охирларида юз бериши мумкин. 19 май куни Мадридда Fitur сайёҳлик ярмаркаси бўлиб ўтиши керак, у «туризмнинг қайта туғилиши»га айланиши кутилмоқда. Ушбу санагача ҳукумат эмланганлар учун рақамли сертификат қўллашни бошлашни режалаштирмоқда.Таиландда эса сайёҳларга икки ҳафталик карантинни Пхукетда яхтада ёки кичик круиз лайнерида ўташ учун рухсат берилди. Фақат COVID-19 тести манфий бўлган сайёҳларгина бундай имкониятга эга бўлади. Бундан ташқари, улар тана ҳарорати, қон босимини назорат қилувчи ва GPS ёрдамида улар жойлашган жойни кўрсатиб турувчи «ақлли» билагузук тақиб юриши керак. Ҳукумат ушбу ташаббус мамлакат бюджетига 58 миллион доллар келтиришига умид қилмоқда.
Вакциналар ва эмлаш билан боғлиқ вазият
Исроилда ўсмирларни эмлаш бошланди. 12 дан 16 ёшгача бўлган 600 га яқин исроиллик болалар коронавирусга қарши Pfizer/BioNTech вакцинаси билан эмланди. Уларда жиддий иккиламчи таъсирлар аниқланмаган.Россия эса болаларни оммавий иммунизация қилмоқчи эмас. «Роспотребнадзор» раҳбари Анна Попова Россияда болаларни коронавирусга қарши оммавий эмлаш учун зарурат йўқлигини айтди. Унинг сўзларига кўра, болалар коронавирусни енгил кечиради ва уларда иммунитет, ҳатто, симптомлар бўлмаса ҳам, тезкорлик билан ишлаб чиқарилади.
Айни пайтда Исроил вакцинация бўйича етакчи давлатлардан бири бўлиб турибди. У ерда COVID-19’га қарши вакцинанинг биринчи дозаси билан аҳолининг 57 фоизи эмланган. Ушбу кўрсаткич бўйича Исроил дунёда иккинчи ўринда. Биринчи ўринда — Сейшель ороллари: у ерда 58 фоиз аҳоли COVID-препаратнинг биринчи қисмини олган. Учинчи ўринда эса Буюк Британия жойлашди, мамлакат аҳолисининг 32 фоизи вакцинанинг биринчи дозасини қабул қилган.
Вакцинанинг камида битта дозасини олган аҳоли улуши бўйича юқори ўнликка Чили, Баҳрайн, АҚШ, Барбадос, Сербия, Мальта ва Марокаш ҳам киради.
АҚШ президенти Жо Байден май охиригача мамлакатдаги вояга етган аҳоли — 260 миллион киши учун етарли бўладиган миқдорда вакцина сотиб олишга ваъда берди. Июль охиригача 300 миллион дозада Модерн ава Pfizer/BioNTech вакциналари етказиб берилади. Бундан ташқари, Байден Johnson&Johnson компаниясидан 100 миллион доза вакцина сотиб олишни буюрди. У коронавирус билан боғлиқ вазиятда кўп нарса ўзгариши мумкинлигини айтиб, АҚШ вакциналарни захира қилиши ва эҳтимолий ўзгаришларга тайёр туриши кераклигини таъкидлади.
Шунингдек, агар аҳолини эмлаш кампанияси чоғида ортиқча вакциналар пайдо бўлса, уларни бошқа мамлакатлар билан бўлишишга тайёрлигини билдирди. «Аввал америкаликлар ҳақида қайғурамиз, сўнг қолган дунёга ёрдам беришга ҳаракат қиламиз», — деди Байден.
Россиянинг коронавирусга қарши вакцинаси Иорданияда, Мароккода, Кенияда ва Зимбабведа ҳам фойдаланиш учун маъқулланди. Шу тариқа, «Спутник V» рўйхатдан ўтказилган давлатлар сони 49 тага етди.
Изоҳ (0)