Shahzoda Garrining rafiqasi Megan Marklning otasi Tomas Markl qizining Opra Uinfri bilan suhbatda aytgan gaplariga izoh berdi. U bu haqda tonggi Good Morning Britain ko‘rsatuvida gapirdi, deb xabar beradi “Korrespondent.net”.
Qayd etilishicha, Tomas Markl eshitgan gaplari haqidagi taassurotlarini jamoatchilikka yetkazish istagini shaxsan o‘zi bildirgan.
“Men qizimning Opra Uinfri bilan suhbatidan qattiq xafa bo‘ldim. Garri va Megan juda og‘ir bir damda qirollik oilasiga kuchli zarba berdi”, — dedi u. Tomasning aytishicha, ushbu intervyu hech bo‘lmaganda 99 yoshli shahzoda Filipp tuzalib ketgunga qadar namoyish etilmasligi kerak edi.
Meganning psixologik muammolar haqida o‘ylab topgan gaplari otasini o‘zining tarafiga og‘dira olmadi. Tomas monarxlarni qo‘llab-quvvatlashda davom etadi. Gersoginyaning otasi qiziga qirol oilasidan hech qanday bosim o‘tkazilmaganiga amin va uning fikricha, irqchilik haqidagi gaplar jiddiy emas.
“Men inglizlarni irqchi deb o‘ylamayman. Archining tanasi rangi haqidagi suhbat esa ahmoqona savoldan iborat bo‘lgan bo‘lsa kerak. Men har doim qizimni yaxshi ko‘rib kelganman, bundan keyin ham yaxshi ko‘raman” — ta’kidladi Tomas Markl.
O‘z navbatida, Tomas Markl ikki yil oldin qizini ayblab intervyu bergani uchun yuz martalab kechirim so‘raganini, ammo buning evaziga na qizi va na kuyovidan hech qanday javob olmaganini aytdi. Tomasning so‘zlariga ko‘ra, u jurnalistlar bilan faqat Megan uni kechirishi uchun muloqot qiladi va qizi kechirishi bilan Tomas OAVga izoh berishni to‘xtatadi.
Eslatib o‘tamiz, Britaniya shahzodasi Garri va uning rafiqasi Megan Markl amerikalik mashhur teleboshlovchi Opra Uinfriga intervyu berdi. Intervyu Toshkent vaqti bilan 8-martga o‘tar kechasi Amerikaning CBS telekanalida, 9-martga o‘tar kechasi Britaniyaning ITV telekanalida namoyish qilindi. Norasmiy ma’lumotlarga ko‘ra, ushbu kanallar intervyuning translyatsiyasi huquqi uchun kamida 8,4 million dollar to‘lagan. Ammo xarajatlar o‘rni allaqachon qoplangan bo‘lishi mumkin, chunki translyatsiya AQShda 17 million kishini, Buyuk Britaniyada 12 million kishini ekran qarshisiga “mixlagan”. Shahzoda Garri va rafiqasi Marklning intervyusi shov-shuvga aylanib, ayni paytda butun dunyoda muhokama qilinmoqda. Yelizaveta II esa nabirasining intervyusiga baho berish uchun biroz vaqt kerakligini aytgan.
Izoh (0)