Қирғизистонда янги конституция қабул қилиш бўйича референдум 11 апрель куни ўтказилади

Қирғизистон парламенти депутатлари сўнгги — учинчи ўқишда мамлакатнинг янги конституциясини қабул қилиш бўйича референдумни 11 апрелда ўтказишни назарда тутувчи қонун лойиҳасини маъқуллади. Бу ҳақда мамлакат қонун чиқарувчи органининг матбуот хизматига таяниб, «Интерфакс» хабар берди.

«11 март кунги йиғилишда 94 нафар депутат (ҳозирда Қирғизистон парламентида 120 нафар депутат бор) иккинчи ва учинчи ўқишда 11 апрель куни янги конституцияни қабул қилиш бўйича референдум ўтказиш тўғрисидаги қонун лойиҳасини маъқуллади», — дея хабар қилди матбуот хизмати.

Шу тарзда, референдум маҳаллий сайловлар билан бир вақтда бўлиб ўтади.

8 февраль куни Қирғизистон президенти Садир Жапаров маҳаллий кенгашлар учун депутатлар сайловини 11 апрелда ўтказиш тўғрисида фармонни имзолаган эди.

17 февралдан Қирғизистон парламенти мамлакат конституциясининг янги лойиҳасини муҳокама қила бошлади, унда мамлакатда президентлик бошқарув шаклини тасдиқлаш, Халқ қурултойи институтини (Халқ ассамблеяси) жорий этиш, шунингдек, парламент депутатлари сонининг ҳозирги миқдори— 120 кишидан 90 кишига камайтириш масалалари кўзда тутилган.

Янги конституция лойиҳасида айтилишича, битта Қирғизистон президенти мамлакатни кўпи билан икки марта беш йил муддатга бошқариши мумкин бўлади. Қирғизистоннинг амалдаги конституциясига биноан давлат раҳбари олти йил муддатга сайланади, лекин икки марта сайланиши мумкин эмас.

Янги лойиҳага кўра, ҳукумат тузилиши ва таркиби президент томонидан белгиланади, бош вазир бошчилигидаги ҳукумат фаолияти президент маъмурияти томонидан таъминланади. Ҳукумат раҳбари, ўз навбатида, президент маъмуриятига раҳбарлик қилади.

Лойиҳада, шунингдек, Қирғизистон конституциявий судини тузиб, конституциявий палатани Олий суд таркибидан чиқариш таклиф этилади.

Эслатиб ўтамиз, Президент Шавкат Мирзиёевнинг таклифига биноан Қирғизистон президенти Садир Жапаров 11 март куни давлат ташрифи билан Ўзбекистонга келди. Уни бош вазир Абдулла Арипов кутиб олди.

Садир Жапаров Қирғизистон президенти сифатидаги илк чет эл сафарини 24—25 февраль кунлари Россияга амалга оширган эди.