Ўзбекистон бўйлаб кузатилаётган ноқулай об-ҳаво шароити сабабли 550 мингдан ортиқ истеъмолчи электрсиз қолган

Ўзбекистонда ноқулай об-ҳаво шароити сабабли электр тармоқларидаги узилишлар оқибатида 550 мингдан ортиқ истеъмолчи электрсиз қолган. Бу ҳақда Ҳудудий электр тармоқлари бошқаруви раисининг биринчи ўринбосари Жаҳонгир Обиджонов АОКА ҳузуридаги брифингда маълум қилди.

Таъкидланишича, мамлакатда 21 январь куни бошланган ва ҳозир давом этаётган кучли шамол, қор бўрони оқибатида ҳаво электр тармоқлари ҳамда трансформатор пунктларига етказилган шикаст натижасида республика бўйича 110 киловатт кучланишли 7 дона ҳаво линиясида ва 6-10 киловатт кучланишли 476 дона ҳаво линиясида узилишлар вужудга келган.

Тезкор маълумотларга кўра, электр энергиясидаги узилишлар натижасида 550 100 истеъмолчи электр энергиясисиз қолган.

Жаҳонгир Обиджоновнинг маълум қилишича, тармоқларда содир бўладиган авариявий ўчишларни тезкор бартараф этиш мақсадида аввалдан ҳудудларда жами 481 та тезкор авариявий чиқиш бригадаси, уларга 378 та махсус авариявий чиқиш машинаси, махсус техникалар ҳамда раҳбар ходимлардан иборат навбатчилик ташкил этилган.

Содир бўлган авариявий ҳолатлар тун-у кун ташкил этилган навбатчи бригадалар томонидан техника хавфсизлик қоидаларига амал қилган ҳолда таъмирлаш-тиклаш ишлари олиб борилиб, барча авариявий ўчган 110-35 киловатт кучланишли тармоқлар ҳамда 247 дона 6-10 киловатт кучланишли линиялар тармоққа қайта уланди.

Ҳозирда электр энергиясиз қолган 350 200 дан ортиқ ёки деярли 60 фоиз истеъмолчи қайта тармоққа уланган. Айни вақтда республика бўйича 6-10 киловатт кучланишли 229 дона ҳаво линиясида узилишлар мавжуд бўлиб, уларда таъмирлаш-тиклаш ишлари давом эттирилмоқда.

Авариявий ҳолатларни бартараф этиш мақсадида ҳудудий корхоналарда 395 дона тармоқ трансформатор, 191,8 тонна трансформатор мойи, 947 дона таянч, 53,9 тонна турли ўлчамдаги сим, 41,5 километр кабел маҳсулотлари ҳамда 638 дона кабел муфтасидан иборат захира яратилган. Мазкур тезкор бригадалар алоқа воситалари ва бошқа зарур жиҳозлар билан таъминланган.

Шунингдек, ноқулай об-ҳаво шароити айрим ҳудудларда бугун ҳам давом этишини ҳисобга олиб, Ҳудудий электр тармоқлари корхонаси аҳолини электр энергиясида вужудга келиши мумкин бўлган узилишлардан огоҳлантирди.

Эслатиб ўтамиз, Ўзбекистоннинг барча вилоятларида 22 январь куни қор бўрони кузатиляпти. Қор ва кучли шамол Бухоро, Андижон ва Хоразм вилоятларининг бир қатор туманларини чироқсиз қолдирган.