Ijtimoiy tarmoqlarda energetika vaziri o‘rinbosari Behzod Normatov imzosi qo‘yilgan faksogramma tarqaldi.

Foto: Telegram

Faksogrammada 2021-yilning 21-yanvarida Qoraqalpog‘iston Respublikasi va Xorazm viloyatida, kechki payt Buxoro, Navoiy viloyatlarining ba’zi joylarida yomg‘ir va qor yog‘ishi kutilayotgani sabab aksiyadorlik jamiyati rahbarlari ogohlantirilgan va tizimdagi barcha korxonalarda sanoat xavfsizligi ishlarini kuchaytirish lozimligi ta’kidlangan.

Foto: “Daryo”

21-yanvar kuni  kechki payt soat 23:00 dan boshlab Buxoro shahrining katta qismi va viloyatning boshqa tumanlari elektr energiyasiz qolgan. Issiqlik tizimida ham muammolar kuzatilgan. Ayniqsa, Buxoro shahrining 3, 4, 6-kichik nohiyalarida qariyb tongga qadar elektr energiyasi qayta tiklanmagan.

Elektr energiyasining uzilishi Prezident tashrifi chog‘ida yuzaga kelgani va uzilish viloyatning boshqa hududlarida kuzatilgach, holat ijtimoiy tarmoqlarda ko‘plab muhokamalarni keltirib chiqargan.

Foto: “Daryo”

Vaziyatga oydinlik kiritish maqsadida “Daryo” muxbiri “Buxoro hududiy elektr tarmoqlari korxonasi” AJning Buxoro shahar bo‘limi boshlig‘i o‘rinbosari Anvar Qurbonov bilan suhbatlashdi.

“Mazkur tashrif Prezidentimizning Buxoroga birinchi tashrifi emas. Bunday holat ilgari hech qachon kuzatilmagan. Noqulay ob-havo sharoiti tufayli hududdagi elektr tarmoqlari tizimida nosozliklar kelib chiqdi. Kuchli shamol bilan yomg‘ir aralash qorning yog‘ishi, ustiga-ustak, qorning ham muz aralash kelishi elektr energiyasi ta’minotida uzilishlar yuzaga kelishiga sabab bo‘ldi. Hududdagi ‘Mohi-Xossa’ va ‘Alatxona’ nimstantsiyalarida uzilishlar yuzaga keldi. Ma’lumki, har bir nimstantsiyaga 70 ga yaqin transformatorlar ulangan bo‘ladi. Agar bitta transformatorda qisqa tutashuv yuzaga kelsa, bu to‘g‘ridan to‘g‘ri nimstantsiyadagi yo‘nalishli fider moslamasining o‘chib qolishiga sabab bo‘ladi. Natijada fider moslamasi bilan aloqador boshqa transformatorlarda ham elektr energiyasi ta’minotdan uzilish kuzatiladi”, — deydi Anvar Qurbonov.

Foto: “Daryo”

O‘rinbosarga ko‘ra, 21-yanvar kuni kechasi yuzaga kelgan holatni bartaraf etish maqsadida 28 nafar kishidan iborat maxsus guruh tuzilib, tezkor ishlar olib borilgan.

“Holat o‘rganilganda, har birida uch fazada elektr energiyasi tarqaladigan qator transformatorlarning o‘chirib-yoqish uskunalari qismi, ya’ni ‘rublnik’lar usti qor bilan qoplangani va qorning erishi oqibatida qisqa tutashuvlar yuzaga kelib, simlar uzilgani kuzatildi. Aytish joizki, oyoq ostining qor va yomg‘ir, yetmagandek, yuqori darajada namligi katta tok kuchlanishi mavjud transformatorlar oldiga borish va o‘sha paytning o‘zida ta’mirlash va sozlash ishlarini amalga oshirish imkonini bermadi”, — deydi Anvar Qurbonov.

Anvar Qurbonov.

Foto: “Daryo”

“Buxoro hududiy elektr tarmoqlari korxonasi” AJ bosh injeneri Ruhillo Sharipovning “Daryo” muxbiriga ma’lum qilishicha, viloyatda jami 88 ta nimstantsiya mavjud. Mazkur nimstantsiyalarga 5300 dan ortiq transformator ulangan. Har bir hududda 7—8 tadan guruh ish olib bormoqda.

Foto: “Daryo”

“Buxoroning barcha tuman, shaharlari elektr ta’minoti korxonalari tomonidan yuzaga kelgan uzilishlarni bartaraf etish ishlari hozirgacha davom etmoqda. Talay hududlarda ta’minot tiklandi. Bugun soat 19:00 gacha elektr energiyasi ta’minotini to‘liq tiklash uchun barcha say’-harakatlar ishga solinmoqda. Brigadalar ishlayapti”, — dedi Ruhillo Sharipov.

Eslatib o‘tamiz, avvalroq 21-yanvar kuni yopirilgan qor bo‘ronidan so‘ng Xorazm viloyatining ko‘plab hududlari, xususan, viloyat ma’muriy markazi Urganch shahri ham elektr ta’minotidan uzilib qolgani haqida xabar berilgan edi. Qor va kuchli shamol shuningdek, Andijon viloyatining bir qator tumanlarini chiroqsiz qolishiga ham sabab bo‘ldi.