Ижтимоий тармоқларда энергетика вазири ўринбосари Беҳзод Норматов имзоси қўйилган факсограмма тарқалди.
Факсограммада 2021 йилнинг 21 январида Қорақалпоғистон Республикаси ва Хоразм вилоятида, кечки пайт Бухоро, Навоий вилоятларининг баъзи жойларида ёмғир ва қор ёғиши кутилаётгани сабаб акциядорлик жамияти раҳбарлари огоҳлантирилган ва тизимдаги барча корхоналарда саноат хавфсизлиги ишларини кучайтириш лозимлиги таъкидланган.
21 январь куни кечки пайт соат 23:00 дан бошлаб Бухоро шаҳрининг катта қисми ва вилоятнинг бошқа туманлари электр энергиясиз қолган. Иссиқлик тизимида ҳам муаммолар кузатилган. Айниқса, Бухоро шаҳрининг 3, 4, 6-кичик ноҳияларида қарийб тонгга қадар электр энергияси қайта тикланмаган.
Электр энергиясининг узилиши Президент ташрифи чоғида юзага келгани ва узилиш вилоятнинг бошқа ҳудудларида кузатилгач, ҳолат ижтимоий тармоқларда кўплаб муҳокамаларни келтириб чиқарган.
Вазиятга ойдинлик киритиш мақсадида «Дарё» мухбири «Бухоро ҳудудий электр тармоқлари корхонаси» АЖнинг Бухоро шаҳар бўлими бошлиғи ўринбосари Анвар Қурбонов билан суҳбатлашди.
«Мазкур ташриф Президентимизнинг Бухорога биринчи ташрифи эмас. Бундай ҳолат илгари ҳеч қачон кузатилмаган. Ноқулай об-ҳаво шароити туфайли ҳудуддаги электр тармоқлари тизимида носозликлар келиб чиқди. Кучли шамол билан ёмғир аралаш қорнинг ёғиши, устига-устак, қорнинг ҳам муз аралаш келиши электр энергияси таъминотида узилишлар юзага келишига сабаб бўлди. Ҳудуддаги ‘Моҳи-Хосса’ ва ‘Алатхона’ нимстанцияларида узилишлар юзага келди. Маълумки, ҳар бир нимстанцияга 70 га яқин трансформаторлар уланган бўлади. Агар битта трансформаторда қисқа туташув юзага келса, бу тўғридан-тўғри нимстанциядаги йўналишли фидер мосламасининг ўчиб қолишига сабаб бўлади. Натижада фидер мосламаси билан алоқадор бошқа трансформаторларда ҳам электр энергияси таъминотдан узилиш кузатилади», — дейди Анвар Қурбонов.
Ўринбосарга кўра, 21 январь куни кечаси юзага келган ҳолатни бартараф этиш мақсадида 28 нафар кишидан иборат махсус гуруҳ тузилиб, тезкор ишлар олиб борилган.
«Ҳолат ўрганилганда, ҳар бирида уч фазада электр энергияси тарқаладиган қатор трансформаторларнинг ўчириб-ёқиш ускуналари қисми, яъни ‘рубльник’лар усти қор билан қоплангани ва қорнинг эриши оқибатида қисқа туташувлар юзага келиб, симлар узилгани кузатилди. Айтиш жоизки, оёқ остининг қор ва ёмғир, етмагандек, юқори даражада намлиги катта ток кучланиши мавжуд трансформаторлар олдига бориш ва ўша пайтнинг ўзида таъмирлаш ва созлаш ишларини амалга ошириш имконини бермади», — дейди Анвар Қурбонов.
«Бухоро ҳудудий электр тармоқлари корхонаси» АЖ бош инженери Руҳилло Шариповнинг «Дарё» мухбирига маълум қилишича, вилоятда жами 88 та нимстанция мавжуд. Мазкур нимстанцияларга 5300 дан ортиқ трансформатор уланган. Ҳар бир ҳудудда 7—8 тадан гуруҳ иш олиб бормоқда.
«Бухоронинг барча туман, шаҳарлари электр таъминоти корхоналари томонидан юзага келган узилишларни бартараф этиш ишлари ҳозиргача давом этмоқда. Талай ҳудудларда таъминот тикланди. Бугун соат 19:00 гача электр энергияси таъминотини тўлиқ тиклаш учун барча сай’-ҳаракатлар ишга солинмоқда. Бригадалар ишлаяпти», — деди Руҳилло Шарипов.
Эслатиб ўтамиз, аввалроқ 21 январь куни ёпирилган қор бўронидан сўнг Хоразм вилоятининг кўплаб ҳудудлари, хусусан, вилоят маъмурий маркази Урганч шаҳри ҳам электр таъминотидан узилиб қолгани ҳақида хабар берилган эди. Қор ва кучли шамол шунингдек, Андижон вилоятининг бир қатор туманларини чироқсиз қолишига ҳам сабаб бўлди.
Изоҳ (0)