Навоийда ўғрилик учун 5 йил қамалиб чиққан шахс 2 ой ўтмай ИИБ ходими Lacetti’сини олиб қочмоқчи бўлди

Навоийда ИИБ ходимининг автомашинасини олиб қочмоқчи бўлган муқаддам судланган шахс қўлга олинди, деб хабар бермоқда вилоят ИИБ матбуот хизмати.

Маълум бўлишича, Навоий шаҳрида туғилган, вақтинча ишсиз, муқаддам судланиб, Жиноят кодексининг 169-моддаси (ўғрилик) 3-қисми билан 5 йил муддатга озодликдан маҳрум қилиниб, 2020 йилнинг 29 ноябрида жазони ижро этиш колониясидан озодликка чиқарилган 40 ёшли фуқаро У.К. яна ўғриликка қўл урган.

2021 йил 16 январь куни соат 12:30 лар атрофида Навбаҳор туманида яшовчи, Навбаҳор тумани ИИБ Миграция ва фуқароликни расмийлаштириш гуруҳи инспектори Ж.М.га тегишли бўлган Lacetti’ни олиб қочмоқчи бўлган.

Шаҳарнинг Ислом Каримов кўчасида тўхтаб турган автомашинанинг эшигини калит танлаш йўли билан очаётган вақтида ушбу ҳолатни кўриб қолиб, қаршилик қилган инспекторнинг юзига бир неча маротаба уриб, ҳодиса жойидан қочиб кетмоқчи бўлганида автомашина эгаси томонидан ушлаб қолинган.

Ҳолат юзасидан У.К.га нисбатан Жиноят кодексининг 169-моддаси (ўғрилик) 4-қисми билан жиноят иши қўзғатилган. Ҳозирда суриштирув ишлари олиб борилмоқда.