АҚШда Капитолий штурмида қатнашганлар ҳибсга олинди. Улар орасида QAnon «шомони» ҳам бор

АҚШда Вашингтон шаҳридаги Капитолий биносига уюштирилган босқинда иштирок этган беш киши ҳибсга олинди, дея хабар бермоқда The New York Times.

Jacob Anthony Chansley, aka Jake Angeli, has been arrested for his participation in the #CapitolBuilding attack. pic.twitter.com/wQcnyLypj3

— Anonymous (@YourAnonCentral) January 9, 2021

Ҳибсга олинганлар орасида 33 ёшли аризоналик, QAnon конспирология ҳаракати аъзоси, Жейк Анжели ёки Қ Шаман номи билан танилган Жейкоб Энтони Ченсли ҳам бор. У Капитолийга кўйлакчанг ҳолда, шохи бор мўйнали қалпоқ кийиб бостириб кирган эди, унинг юзи Америка байроғи рангларига бўялган, қўлида эса АҚШ байроғи ўрнатилган найза бор эди. Жейк Анжелига безорилик ва давлат муассасаси ҳудудига зўрлик ишлатиб кириш моддалари билан айблов эълон қилинган.

Шунингдек, флоридалик 36 ёшли Адам Жонсон ҳам ҳибсга олинган. У Капитолий штурми вақтида АҚШ Конгресси Вакиллар палатаси спикери Нэнси Пелосига тегишли кафедра (минбар)ни олиб қочаётгани билан ёдда қолган эди. Жонсон далват мулкини ўғирлаш, бинога зўрлик ишлатиб кириш ва Капитолий ҳудудида безорилик қилишда айбланмоқда.

https://twitter.com/shaunking/status/1347918858720600065

Бундан ташқари, Ғарбий Виржиния штати қонунчилик мажлиси вакили, 35 ёшли республикачи Деррик Эванс ҳам ҳибсга олинган — у интернетда Капитолий биносига штурмнинг бошқа иштирокчилари билан бирга кириб бораётгани акс этган видеони эълон қилган эди. Эванс давлат муассасаси ҳудудига зўрлик ишлатиб кириш ва безориликда айбланмоқда. У 9 январь куни эгаллаб турган лавозимини бўшатган.

Дуг Женсен ҳам штурм вақтида видеога тушиб қолганлардан бири. У полициячиларга халал бериш, шунингдек, Капитолий биносида намойиш ўтказишда айбланмоқда. Арканзаслик 60 ёшли Ричард Барнетт эса ҳибсга олинганларнинг бешинчиси бўлиб, у штурм вақтида Нэнси Пелосининг хонасида оёғини столга қўйиб ўтирган.

Officials say Richard Barnett, the man photographed sitting at House Speaker Pelosi's desk during the Capitol siege, has been arrested in Arkansashttps://t.co/DezQ11L1dg pic.twitter.com/ikvfuRpqGu

— CNN Breaking News (@cnnbrk) January 8, 2021

Капитолийдаги тартибсизликлардан сўнг штурмнинг жами 13 нафар иштирокчисига нисбатан айблов эълон қилинган. Улар, жумладан, Капитолий ҳудудига зўрлик ишлатиб кириш ва безориликда айбланмоқда. NYT’нинг қайд этишича, ҳибсга олинганлар сони ҳали ўсиши мумкин, чунки терговчилар штурм иштирокчиларининг шахсини аниқлаш учун ижтимоий тармоқларни диққат билан ўрганмоқда.

Полиция «штурмчи»ларнинг шахсини аниқлашга ёрдам берганларга 1000 доллардан ваъда қилмоқда

Аввалроқ Колумбия округи полицияси Капитолий штурмида қатнашганларнинг суратларини эълон қилиб, уларнинг шахсини аниқлашда жамоатчиликдан ёрдам сўраган эди. Суратда акс этганларнинг ҳар бири ҳақида берилган ахборот учун 1000 доллар миқдорида мукофот пули ҳам ваъда қилинган. Reuters’нинг ёзишича, Федерал тергов бюроси (ФТБ) ҳам тартибсизликларда қатнашганларнинг шахсини аниқлашда худди шундай ёрдам сўраб америкаликларга мурожаат қилган.

Twitter фойдаланувчилари ҳам Капитолий штурмида қатнашганларнинг шахсини аниқлашга фаол киришган, деб ёзади Meduza. Тартибсизликларнинг шахсини аниқлашга муваффақ бўлинган айрим иштирокчилари ҳатто ишидан ҳам айрилиб улгурган. Масалан, Navistar Direct Marketing компаниясининг мерилендлик ходимларидан бири Капитолийга бостириб кириш жараёнида ишчи бейжини ҳам ечмай қатнашган.

Navistar Direct Marketing компанияси ходимларнинг сўз эркинлигига бўлган ҳуқуқини ҳурмат қилишини, бироқ атрофдагиларнинг ҳаёти ва саломатлигига хавф соладиган хулқ-атвор эгалари компанияда ишлай олмасликларини маълум қилган. Компания ишдан ҳайдалган ходимнинг исмини ошкор этмаган.

АҚШнинг амалдаги президенти Дональд Трамп тарафдорлари 6 январь куни Капитолийга бостириб кирган эди — бу вақтда Конгресснинг ҳар иккала палатаси ноябрда ўтган президент сайлови якунларини (унда демократ Жо Байден ғалаба қозонган) тасдиқлаётган эди. Тартибсизликлар давомида беш киши, жумладан, Капитолий полициясининг бир ходими ҳалок бўлган. Трамп бу тартибсизликларни, улар ўз тарафдорлари томонидан амалга оширилган бўлса-да, қоралаб, барча айбдорлар жавобгарликка тортилишини таъкидлаган эди.

Ҳуқуқ-тартибот органларининг штурм вақтидаги хатти-ҳаракатлари жамоатчилик норозилигига сабаб бўлди, хусусан, Конгресс қуйи палатаси спикери Нэнси Пелоси ҳам уларни ҳам кескин танқид қилди. Associated Press маълумотларига кўра, тартибсизликлар юз беришидан бир неча кун аввал Капитолий полициясига кўмак сифатида Миллий гвардия жангчилари ва ФТБ агентларини ажратиш таклиф қилинган, бироқ полиция бу имкониятдан фойдаланмаган. Тартибсизликлардан сўнг, Капитолий полицияси раҳбари истеъфо берди.