Таиланд қуруқлик қўшинлари чегарадаги тўқнашувдан сўнг 18 нафар камбоджалик ҳарбий хизматчини асирга олди. Бу ҳақда Таиланд қуруқлик қўшинлари қўмондонлигининг расмий вакили генерал майор Винтхай Сувари маълум қилди.
“Қуруқлик қўшинларининг иккинчи ҳарбий округи Сисакет вилояти ҳудудидаги чегара қисмида юз берган тўқнашувдан кейин 18 нафар Камбоджа ҳарбий хизматчиси асирга олинганини хабар қилди. Жароҳат олган камбоджалик ҳарбийларга тиббий ёрдам кўрсатилмоқда, асирлар Женева конвенцияси талабларига тўлиқ риоя қилинган ҳолда сақланмоқда”, деди генерал Сувари.
Генералнинг айтишича, Камбоджа ҳарбий хизматчилари Таиланд ҳудудини ўққа тутиш учун оғир қуроллар ва миномётлардан фойдаланган.
“Таиланд қўмондонлиги душманнинг ўт очишини тўхтатиш ва Камбоджа позицияларини тозалаш учун махсус вазифали зирҳли кавалерия бўлинмасини (механизациялашган қўшин разведкаси) юборди. Ўтказилган операция давомида 18 нафар камбоджалик ҳарбий хизматчи асирга олинди, уларнинг кўпчилиги жангсиз таслим бўлди”, деди у.
Такидланишича, йўқ қилинган Камбоджа позицияларида асир тушган Камбоджа аскарларидан ташқари, қўли ва сонидан яраланган Камбоджа катта сержанти ҳамда ҳалок бўлган икки нафар Камбоджа ҳарбий хизматчиларининг жасадлари ҳам топилган.
“Ярадор даволаниш учун шифохонага етказилди. Ҳарбий хизматчиларимиз ҳалок бўлган аскарлар жасадларини душман аскарлари жасадларига ҳурмат кўрсатиш анъаналарига мувофиқ Камбоджа томонига қайтаради”, деди генерал майор.
Қуруқлик қўшинлари расмий вакилининг сўзларига кўра, Таиланд томонидан бир нафар камбоджалик лейтенант, икки нафар мастер-сержант, 12 нафар катта сержант, 2 сержант ва 1 кичик сержант асирга олинган.
24 июль куни Таиланд ва Камбоджа ҳарбийлари ўртасида қуролли тўқнашувлар бошланди. Таиланд расмийларининг таъкидлашича, Камбоджанинг 6 нафар қуролланган аскари мамлакат чегарасига яқинлашган. Орадан кўп ўтмай, ҳавода дронлар ҳам пайдо бўлган. Таиландликлар вазиятни юмшатиш учун уларга огоҳлантириш бергани, бироқ Камбоджа томони бунга ўт очиш билан жавоб қайтарганини даъво қилди.
28 июль куни Малайзия пойтахти Куала Лумпур яқинидаги Путражая шаҳрида, Камбоджа бош вазири Хун Манет ва Таиланд муваққат бош вазири Пҳумтам Вечаячай ўртасида ўтган ярашув бўйича музокаралар натижасида 29 июль куни маҳаллий вақт билан 00:00 дан бошлаб ҳеч қандай шартсиз ва зудлик билан ўт очишни тўхтатишга келишиб олинди.
Изоҳ (0)