7 январь куни дунёдаги энг бой одамга айланган SpaceX космик компанияси асосчиси ва Tesla бош директори Илон Маск Марсда колония ташкил қилиш йўлида ўзининг барча давлатини сотиб юборишга қарор қилди, деб ёзади «РБК», Business Insider’га таяниб.
Бизнесменнинг айтишича, унинг Марсда шаҳар қуриш режаси анча катта маблағни талаб этади. Унинг сўзларига кўра, бу уни ўз бойлиги билан хайрлашишга ундовчи сабаблардан биридир. Яна бир сабаб, деди Маск, у Марсда колония ташкил қилиш борасида қанчалик қатъий қарорга эга эканлигини бутун дунёга намойиш қилиш истагидир.
«Аслида, менда компания акцияларидан ташқари, пул қийматига эга бўлган мулк деярли қолмайди. Ишлар қизғин кетаётган пайтда мен фабрикада ёки офисда ухлашни ёқтираман. Агар болаларим пайдо бўлса, албатта, қандайдир уй керак бўлади. Лекин мен уни шунчаки ижарага олишим ёки яна бошқача чора кўришим мумкин», — деди тадбиркор.
Business Insider қайд этишича, Маск дунёнинг энг бой одамлари рўйхатида Amazon асосчиси Жефф Безосни ортда қолдирганидан кейин Twitter’даги саҳифасида бириктирилган постини ўзгартирган. У ерга у 2018 йилги постини жойлаштирган, унда Марсда шаҳар қуриш учун бойлигининг ярмини ажратишни ваъда қилган эди.
Аввалроқ Маск 2050 йилгача Марсга 1 миллион одамни юборишни ҳамда 1000 та юлдуз кемасидан иборат флот қуриб, уларни ўша ёққа жўнатишни режалаштираётгани ҳақида гапирган эди. Марсга парвоз қилиш учун молиявий имкониятлари бўлмаганлар учун Маск қарз ҳамда Қизил сайёрада иш ўринлари тақдим этишга тайёрлигини маълум қилди.
Business Insider журналистлари тахмин қилишича, Маск Техасга кўчиб ўтиши доирасида Калифорниядаги кўчмас мулкини сотаётган бўлиши мумкин, у ерда эса штат даромад солиғи йўқ. Ўтган йил баҳорида Маск Калифорниядаги мулкини сотаётгани ҳақидаги хабарлар пайдо бўла бошлаган эди. Сотувлар бошлангунига қадар Маск умумий қиймати 100 миллион долларга тенг камида еттита уйга эга эди. Май бошида у барча мулкларини сотишини ва ўз уйи бўлмаслигини айтганди. «Менга пул керак эмас. Ўзимни Марс ва Ерга бағишлайман. Мол-мулк сизни шунчаки пастга тортади», — дея ўз қарорини изоҳлаган эди Маск ўшанда.
Эслатиб ўтамиз, Илон Маск Bloomberg талқинига кўра дунёдаги энг бадавлат одамга айланди. Бу унинг Tesla компанияси акцияларининг 7,9 фоизга ўсиши фонида юз берди, бунинг шарофати билан тадбиркорнинг бойлиги 194,8 миллиард долларгача ўсди — бу бир неча йиллардан буён биринчиликни эгаллаб келган Amazon асосчиси Жефф Безоснинг давлатидан 9,5 миллиард долларга кўп. Агентлик қайд этишича, шу пайтгача ҳеч ким бунчалик тез бойимаган эди — бир йил ичида Tesla раҳбарининг бойлиги 165 миллиард долларга кўпайган. Таққослаш учун, бу Билл Гейтснинг умумий бойлиги миқдорига тенг. Маск Tesla акцияларининг кескин ўсиб бориши фонида бойимоқда, 2020 йилдаги ўсиш 743 фоизга тенг бўлди.
Изоҳ (0)