Буюк Британия қироличаси Елизавета II ва унинг эри, Эдинбург герсоги Филипп 9 январь куни COVID-19 касаллигига қарши эмланди, деб хабар берди The Guardian Букингем саройининг баёнотига асосланиб.
Қироллик жуфтлиги Виндзор қалъасида эмланди. Улар ушбу қалъада мамлакатда жорий қилинган локдаунни ўтказиши кутилмоқда.
Guardian таъкидлашича, Букингем саройи камдан кам ҳолларда Елизавета II ва унинг турмуш ўртоғининг соғлиғига оид масалаларни оммага ошкор қилади.
Нашрнинг маълум қилишича, оғир эпидемиологик вазият туфайли Елизавета II ва унинг эри Сандригем саройидаги анъанавий оилавий йиғилишни тарк этиб, Виндзор қасрида Рождество байрамини нишонлаган.
Эслатиб ўтамиз, бош вазир Борис Жонсон томонидан 4 январь куни Британияда коронавируснинг янги штамми туфайли учинчи локдаун эълон қилинди. Шундан сўнг, Лондон мери коронавирус туфайли шаҳарда фавқулодда ҳолат эълон қилди.Бугунги кунда ҳар ўттизинчи лондонлик коронавирус билан касалланган. Касалхоналарда бўш жой қолмаган. Одамларни уйда қолишга чақиришмоқда. Лондонда коронавирусга чалиниш ҳолатлари кўпайиб, тиббиёт ходимлари етишмовчилиги кузатилаётгани боис полиция ва ўт ўчирувчилар тез тиббий ёрдам машиналарини ҳайдашга жалб қилинмоқда.
Изоҳ (0)