АҚШнинг амалдаги вице-президенти Майк Пенс сайланган президент Жо Байден ва унинг вице-президенти Камала Ҳарриснинг инаугурациясида қатнашади. Бу ҳақда Politico нашри учта манбага асосланиб хабар бермоқда. Шунингдек, CNN, Reuters ва NBC манбалари буни тасдиқлаган.
Politico нашри суҳбатдошларининг таъкидлашича, Пенс шу тариқа ҳокимиятни тинч йўл билан топшириш анъанасига содиқлигини намойиш этмоқчи.
Манбаларнинг қўшимча қилишича, Пенснинг бу қарорга келишига амалдаги президент Дональд Трамп томонидан бўлган танқидлар ҳам сабаб бўлган. Трамп вице-президентни 6 январь куни Конгрессда президент сайлови натижаларини тасдиқлаш жараёнини тўхтатиб қўйишдан бош тортганини қоралаган эди (оқибатда жараён Капитолий штурми вақтида тўхтаб қолган эди).
NBC манбаларининг таъкидлашича, Капитолий штурми вақтида Трамп бино остидаги бункерга яширинишга мажбур бўлган Пенс ва унинг оиласига қўнғироқ қилиб, хабар олмаган. Бундан ташқари, у Пенсни осишга чақирган штурмнинг айрим иштирокчиларини ҳам қораламаган.
Жо Байден ва Камала Ҳарриснинг инаугурация маросими 20 январь куни бўлиб ўтади. Трамп маросимда иштирок этмаслигини бир неча кун аввал маълум қилган эди.
Капитолийга уюштирилган босқиндан сўнг Демократик партия вакили бўлган бир қатор сиёсатчилар Конституцияга киритилган 25-тузатишга асосан Трампни ҳокимиятдан четлатишни талаб қилди — ушбу тузатишга кўра, президент ўз мажбуриятларини бажара олмай қолса, вице-президент билан алмаштирилади.
The New York Times’нинг ёзишича, Капитолий штурми атрофидаги воқеалар сабаб Трамп билан муносабатлари совуқлашганига қарамай, Пенс 25-тузатишни қўллаш ғоясини маъқулламаяпти. Бироқ кейинроқ CNN манбаси, агар Трампнинг «хулқи янада тахмин қилиб бўлмас даражага етса», у ҳолда Пенс 25-тузатишдан фойдаланишни ўйлаб кўраётганини маълум қилди.
Изоҳ (0)