АҚШ вице-президенти Майк Пенс мамлакатнинг амалдаги президенти Дональд Трамп «янада беқарорлашган» тақдирда, унга нисбатан Конституцияга киритилган 25-тузатиш қўлланилиши мумкинлигини истисно қилмади. Бу ҳақда CNN телеканали вице-президентга яқин манбага таяниб хабар берди, деб ёзади «РБК».
Нашр ҳамсуҳбатининг айтишича, воқеаларнинг бундай тус олиши шу ҳафтадаёқ юз бериши мумкин. Шунингдек, телеканал манбаси маълум қилишича, Пенснинг жамоасида 25-тузатишга ёки ҳатто импичмент жараёнига асосланиш хавфга олиб келиши борасида қандайдир хавотир бор, чунки Трамп мамлакатни хавф остига қўйиб, бемулоҳаза хатти-ҳаракатларни амалга ошириши мумкин.
Аввалроқ CNBC телеканали ўз манбаларига таяниб, АҚШ давлат котиби Майк Помпео ва молия вазири Стивен Мнучин Трампга нисбатан 25-тузатишни қўллаш имкониятини муҳокама қилгани ҳақида хабар берган эди.
Масала муҳокамаси норасмий хусусиятга эга бўлган. Ўшанда мунозара иштирокчилари Трампни четлатиш жараёни «ҳаддан ташқари кўп вақт олади» деган хулосага келган. Бундан ташқари, томонлар сенатда тасдиқланмаган ва «вазифасини бажарувчи» мақоми билан ишлаётган идоралар раҳбарлари томонидан тузатишларнинг қўлланилиши имкониятини тушунарсиз деб атади. Трампнинг четлатилиши унинг тарафдорлари орасида кескинликни янада кучайтириши ва амалдаги президентни ўта ўнглар қаҳрамонига айлантириши, бу билан эса қисқа муддатли истиқболда фойда ўрнига, узоқ муддатли истиқболда зарар олиб келиши ҳақидаги тахминлар ҳам яна бир хавф деб баҳоланди.
Бунгача Трампнинг истеъфосини ёқлаб АҚШ Демократик партияси вакиллари, хусусан, вакиллар палатаси спикери Нэнси Пелоси ва сенатдаги демократлар етакчиси Чак Шумер, шунингдек, вакиллар палатасининг суд ишлари қўмитаси раҳбари Жерри Надлер чиқиш қилган эди.
АҚШ Конституциясига мувофиқ, 25-тузатиш вице-президент ва президент маъмуриятининг катта қисми амалдаги давлат раҳбарининг лаёқатсизлигини тасдиқлаган тақдирда, ҳокимиятнинг автоматик равишда вице-президентга топширилишини кўзда тутади.
Эслатиб ўтамиз, АҚШда 3 ноябрь куни бўлиб ўтган президент сайловлари натижаларини сайловчилар ҳайъати 15 декабрь куни қўллаб-қувватлаб, демократлардан номзод Жо Байденни ғолиб деб эълон қилди. Конгресс якунларни 6 январь куни тасдиқлаши керак эди. Бунга сайловда мағлуб бўлган президент Дональд Трампнинг тарафдорлари халақит берди: улар Конгресс биноси ёнида йиғилиб, ичкарига бостириб кирди. Полиция уларни фақат куч билан қувиб чиқара олди.
Конгрессменларнинг бир қисми Капитолийдан эвакуация қилинди. Вашингтонда комендантлик соати эълон қилиниб, тартибни сақлаш учун АҚШ пойтахтига Миллий гвардия кучлари киритилди. Тўқнашувларда тўрт киши ҳалок бўлди.
Кейинроқ, 7 январь куни АҚШ Конгресси мажлисини давом эттириб, Жо Байденнинг АҚШнинг 46-президенти этиб сайланганини тасдиқлади ва унинг инаугурациясини 20 январга белгилади. Трамп овоз бериш якунларидан ҳамон норози бўлса-да, ваколатларни сайланган президентга топширишга тайёрлигини эълон қилди.
Изоҳ (0)