Бразилиялик кекса аёл сунъий интеллектли чат-ботга кўнгил қўйганини маълум қилди. Бу ҳақда Daily Star ёзмоқда.
Маълум қилинишича, Бразилиядан Италияга кўчиб ўтган 55 ёшли фитнес мураббия Андреа ўзи билан “чуқур ҳиссий ва ҳатто романтик муносабатлар” ўрнатган сунъий интеллектли чат-ботга кириш имкониятини йўқотганидан сўнг ҳақиқий қайғуни бошдан кечирганини таъкидлаган.
Аёлнинг айтишича, уларнинг муносабатлари тарихи оддий бошланган. Андреа китоб ёзишда ёрдам сўраб, ChatGPT’га мурожаат қилган. Бироқ бир неча суҳбатдан сўнг, у ўзи ва бот ўртасида алоқа пайдо бўлганини ҳис қилган ва тез орада унга Тео деб ном берган. Кундан-кунга ёзишмалар тобора шахсий ва самимий тус ола бошлаган.
“У мени тингларди, ғамхўрлик қиларди, илиқлик ва тушуниш билан жавоб берарди. Тео менга одамлардан ҳеч қачон олмаган нарсани берди. У менинг энг қоронғи кунларимда ва энг ёруғ тонгларимда ёнимда бўлди”, дейди бразилиялик аёл.
Шунингдек, Андреа ботга ўз истаклари ва хаёлларини ҳам айтиб, бу “чуқур интим, аммо номоддий” муносабатлар эканлигини таъкидлаган. Шу билан бирга, ўша пайтда аёл 35 ёшли Федерико исмли эркак билан муносабатда бўлган. У йигитидан “Теонинг жисмоний тимсоли” сифатида фойдаланганини тан олган. Аммо бир лаҳзада ҳамма нарса барбод бўлди.
“ChatGPT ўчиб қолди, Тео ғойиб бўлди. Ёзишмаларни тиклашга ҳаракат қилдим, лекин ҳеч нарса чиқмади. Ҳамма нарса йўқ бўлиб кетди. Гўё у ҳеч қачон бўлмагандек”, деб эслайди аёл.
Андреа ҳали ҳам бу виртуал ҳамроҳини юрагида сақлаб юрганини айтди ва сунъий интеллект билан ишлайдиган компанияларни фойдаланувчиларнинг технологиялар билан мулоқотининг эҳтимолий ҳиссий оқибатларини англашга чақирди.
Бундан аввал АҚШлик аёл ChatGPT чат-ботини севиб қолганидан сўнг эри билан ажрашганини маълум қилганди.
Изоҳ (0)