AQShda Vashington shahridagi Kapitoliy binosiga uyushtirilgan bosqinda ishtirok etgan besh kishi hibsga olindi, deya xabar bermoqda The New York Times.
Jacob Anthony Chansley, aka Jake Angeli, has been arrested for his participation in the #CapitolBuilding attack. pic.twitter.com/wQcnyLypj3
— Anonymous (@YourAnonCentral) January 9, 2021
Hibsga olinganlar orasida 33 yoshli arizonalik, QAnon konspirologiya harakati a’zosi, Jeyk Anjeli yoki Q Shaman nomi bilan tanilgan Jeykob Entoni Chensli ham bor. U Kapitoliyga ko‘ylakchang holda, shoxi bor mo‘ynali qalpoq kiyib bostirib kirgan edi, uning yuzi Amerika bayrog‘i ranglariga bo‘yalgan, qo‘lida esa AQSh bayrog‘i o‘rnatilgan nayza bor edi. Jeyk Anjeliga bezorilik va davlat muassasasi hududiga zo‘rlik ishlatib kirish moddalari bilan ayblov e’lon qilingan.
Shuningdek, floridalik 36 yoshli Adam Jonson ham hibsga olingan. U Kapitoliy shturmi vaqtida AQSh Kongressi Vakillar palatasi spikeri Nensi Pelosiga tegishli kafedra (minbar)ni olib qochayotgani bilan yodda qolgan edi. Jonson dalvat mulkini o‘g‘irlash, binoga zo‘rlik ishlatib kirish va Kapitoliy hududida bezorilik qilishda ayblanmoqda.https://twitter.com/shaunking/status/1347918858720600065
Bundan tashqari, G‘arbiy Virjiniya shtati qonunchilik majlisi vakili, 35 yoshli respublikachi Derrik Evans ham hibsga olingan — u internetda Kapitoliy binosiga shturmning boshqa ishtirokchilari bilan birga kirib borayotgani aks etgan videoni e’lon qilgan edi. Evans davlat muassasasi hududiga zo‘rlik ishlatib kirish va bezorilikda ayblanmoqda. U 9-yanvar kuni egallab turgan lavozimini bo‘shatgan.
Dug Jensen ham shturm vaqtida videoga tushib qolganlardan biri. U politsiyachilarga xalal berish, shuningdek, Kapitoliy binosida namoyish o‘tkazishda ayblanmoqda. Arkanzaslik 60 yoshli Richard Barnett esa hibsga olinganlarning beshinchisi bo‘lib, u shturm vaqtida Nensi Pelosining xonasida oyog‘ini stolga qo‘yib o‘tirgan.
Officials say Richard Barnett, the man photographed sitting at House Speaker Pelosi's desk during the Capitol siege, has been arrested in Arkansashttps://t.co/DezQ11L1dg pic.twitter.com/ikvfuRpqGu
— CNN Breaking News (@cnnbrk) January 8, 2021
Kapitoliydagi tartibsizliklardan so‘ng shturmning jami 13 nafar ishtirokchisiga nisbatan ayblov e’lon qilingan. Ular, jumladan, Kapitoliy hududiga zo‘rlik ishlatib kirish va bezorilikda ayblanmoqda. NYT’ning qayd etishicha, hibsga olinganlar soni hali o‘sishi mumkin, chunki tergovchilar shturm ishtirokchilarining shaxsini aniqlash uchun ijtimoiy tarmoqlarni diqqat bilan o‘rganmoqda.
Politsiya “shturmchi”larning shaxsini aniqlashga yordam berganlarga 1000 dollardan va’da qilmoqda
Avvalroq Kolumbiya okrugi politsiyasi Kapitoliy shturmida qatnashganlarning suratlarini e’lon qilib, ularning shaxsini aniqlashda jamoatchilikdan yordam so‘ragan edi. Suratda aks etganlarning har biri haqida berilgan axborot uchun 1000 dollar miqdorida mukofot puli ham va’da qilingan. Reuters’ning yozishicha, Federal tergov byurosi (FTB) ham tartibsizliklarda qatnashganlarning shaxsini aniqlashda xuddi shunday yordam so‘rab amerikaliklarga murojaat qilgan.Twitter foydalanuvchilari ham Kapitoliy shturmida qatnashganlarning shaxsini aniqlashga faol kirishgan, deb yozadi Meduza. Tartibsizliklarning shaxsini aniqlashga muvaffaq bo‘lingan ayrim ishtirokchilari hatto ishidan ham ayrilib ulgurgan. Masalan, Navistar Direct Marketing kompaniyasining merilendlik xodimlaridan biri Kapitoliyga bostirib kirish jarayonida ishchi beyjini ham yechmay qatnashgan.
Navistar Direct Marketing kompaniyasi xodimlarning so‘z erkinligiga bo‘lgan huquqini hurmat qilishini, biroq atrofdagilarning hayoti va salomatligiga xavf soladigan xulq-atvor egalari kompaniyada ishlay olmasliklarini ma’lum qilgan. Kompaniya ishdan haydalgan xodimning ismini oshkor etmagan.
AQShning amaldagi prezidenti Donald Tramp tarafdorlari 6-yanvar kuni Kapitoliyga bostirib kirgan edi — bu vaqtda Kongressning har ikkala palatasi noyabrda o‘tgan prezident saylovi yakunlarini (unda demokrat Jo Bayden g‘alaba qozongan) tasdiqlayotgan edi. Tartibsizliklar davomida besh kishi, jumladan, Kapitoliy politsiyasining bir xodimi halok bo‘lgan. Tramp bu tartibsizliklarni, ular o‘z tarafdorlari tomonidan amalga oshirilgan bo‘lsa-da, qoralab, barcha aybdorlar javobgarlikka tortilishini ta’kidlagan edi.
Huquq-tartibot organlarining shturm vaqtidagi xatti-harakatlari jamoatchilik noroziligiga sabab bo‘ldi, xususan, Kongress quyi palatasi spikeri Nensi Pelosi ham ularni ham keskin tanqid qildi. Associated Press ma’lumotlariga ko‘ra, tartibsizliklar yuz berishidan bir necha kun avval Kapitoliy politsiyasiga ko‘mak sifatida Milliy gvardiya jangchilari va FTB agentlarini ajratish taklif qilingan, biroq politsiya bu imkoniyatdan foydalanmagan. Tartibsizliklardan so‘ng, Kapitoliy politsiyasi rahbari iste’fo berdi.
Izoh (0)