Буюк Британия бош вазири Борис Жонсон мамлакатда коронавирус инфекцияси тарқалишининг кучайиши туфайли янги миллий локдаун киритилиши ҳақида маълум қилди, деб ёзади «РБК». Бу ҳақда у халққа қилган мурожаатида айтиб ўтди.

Фото: Reuters

«Вируснинг янги варианти қўрқитадиган даражада тез тарқалмоқда. Учинчи миллий локдаун зарурлиги аниқ-равшан», — деди Жонсон. Унинг сўзларига кўра, бу коронавирусни назорат остига олиб, мамлакатда кенг кўламли вакцинацияни амалга оширишга ёрдам беради.

Бош вазирнинг айтишича, коронавируснинг янги штамми тарқалиши ҳукуматни ташвишга солмоқда. «Бизнинг COVID-19’га қарши курашдаги жамоавий ҳаракатларимиз иш берган ва агар вируснинг янги тури чиқмаганида эди, иш беришда давом этган бўларди», — деди Жонсон. Унинг таъкидлашича, янги штамм аввалгиларидан 50—70 фоизга юқумлироқ эканлиги олимлар томонидан исботланиб бўлган. Шу сабабли ҳозир касалхоналарга бутун пандемия давридаги энг катта юклама тушмоқда, соғлиқни сақлаш тизимидаги ресурслар эса янги чоралар қабул қилмаса, уч ҳафтадан кейин тугаб қолиши мумкин.

Чекловлар 5 январь, сешанба куни кучга киради. Шу кундан Буюк Британиядаги барча бошланғич ва ўрта мактаблар масофадан ўқишга ўтади. Бундан ташқари, ҳукумат битирув имтиҳонлари жадвалини қайта кўриб чиқади.

Асосий тақиқлар 6 январдан ишга тушади. Бутун мамлакат бўйлаб мажбурий яккаланиш жорий этилади — фуқаролар фақат ишга бориш, озиқ-овқат ва энг зарур нарсаларни сотиб олиш, тиббий ёрдам олиш ёки спорт билзн шуғулланиш учунгина уйдан чиқиши мумкин бўлади.

Борис Жонсоннинг баёнотидан кейинроқ COVID-19 тарқалиши билан боғлиқ вазият ёмонлашиши ортидан яқин уч ҳафта ичида Буюк Британия Соғлиқни сақлаш вазирлигига юклама ҳаддан ташқари ортиб кетиши хавфи ҳақида британиялик тиббиёт ходимлари баёнот берди.

Унда айтилишича, Буюк Британия соғлиқни сақлаш миллий хизматининг кўплаб қисмлари «фавқулодда босим» остида қолган. Мамлакатда коронавирус билан боғлиқ вазият ёмонлашиши ортидан аҳоли орасида касаллик тарқалишининг юқори даражалари кузатилмоқда. COVID-19’га чалинган беморларнинг катта қисми касалхона ва реанимацияларда даволанмоқда, дейилади мақолада.

«Буюк Британия соғлиқни сақлаш миллий хизмати касалланиш ҳолатларининг бундан кейин ҳам барқарор ўсиб боришини кўтара олишига ишончимиз комил эмас ва чоралар кўрилмаса, баъзи ҳудудларда келаси 21 кун ичида Буюк Британия соғлиқни сақлаш миллий хизмати ҳаддан ортиқ ‘қизиб кетиши’ мумкин», — дейилади баёнотда.

Ўз навбатида, Буюк Британия бош шифокори Крис Уитти ўз Twitter’ида мамлакатда COVID-19’нинг янги штаммига чалинган беморлар сони ошгани ҳақида хабар берди.