Buyuk Britaniyada 2020-yil 31-dekabr kuni 55 mingdan ortiq odamda koronavirus aniqlandi, bu pandemiya boshlanganidan buyon mamlakatdagi eng yuqori ko‘rsatkich hisoblanadi. Bu haqda qirollik hukumatining saytida ma’lum qilindi.

Foto: Reuters

So‘nggi bir kun ichida mamlakatda 55 892 kishida virus aniqlangan, 964 kishi vafot etgan.

So‘nggi yetti kun ichida Buyuk Britaniyada 300 mingga yaqin kasallikka chalinish holati qayd etilgan. Ushbu ko‘rsatkich o‘tgan hafta bilan taqqoslaganda 24 foizga ko‘p. O‘lim bilan bog‘liq holatlar esa 8 foizga ortgan.

Buyuk Britaniyada koronavirusdan jami 73,5 mingdan ortiq odam vafot etgan. Bu borada Britaniyadan Yevropa davlatlari orasida faqat Italiya oldinda. Shuningdek, mamlakatda aniqlangan koronavirus bemorlarining soni jami 2,5 millionga yaqinlashdi.

Eslatib o‘tamiz, Buyuk Britaniyada sentabr oyida koronavirusning yangi, yuqumliroq B.1.1.7 shtammi aniqlandi. Dekabr o‘rtalariga kelib, Londondagi kasallanish holatlarining uchdan ikki qismi virusning shu varianti bilan bog‘liq bo‘lib qoldi. 20-dekabrdan Britaniya hukumati yangi shtamm tufayli koronavirusga qarshi cheklovlarni kuchaytirdi.

Bundan tashqari, Buyuk Britaniya dunyoda birinchi bo‘lib COVID-19’ga qarshi AstraZeneca vaksinasidan foydalanishga ruxsat berdi. Mamlakatda ommaviy vaksinatsiya 2020-yil 8-dekabrda boshlangan.