Саудия Арабистони, БАА, Баҳрайн ва Миср Қатарга нисбатан 2017 йилда жорий қилинган дипломатик қамални бекор қилади. Бу ҳақда Reuters АҚШ президенти Дональд Трамп маъмуриятидаги юқори мансабли амалдорга таяниб хабар берди, деб ёзади «РБК».
«Биз Форс кўрфази мамлакатлари ҳамкорлик кенгашида ютуққа эришдик», — деди манба.
Қамални бекор қилиш ва мамлакатлар ўртасидаги алоқаларни нормаллаштириш ҳақидаги келишув 5 январь куни имзоланади. Қатар бунга жавобан араб мамлакатларига нисбатан даъволардан воз кечади.
Агентлик ҳамсуҳбатига кўра, қамални бекор қилиш ҳақидаги битимга Трампнинг куёви ва бош маслаҳатчиси Жаред Кушнер ёрдамида эришилган. У ҳужжатни имзолашда ҳам иштирок этади.
Reuters Кувайт ТИВга таяниб хабар қилишича, 4 январь, душанбадан Саудия Арабистони Қатар билан авиақатновни қайта тиклади, қуруқлик ва денгиз чегараларини очди.
Шу хабардан кейин Қатар шайхи Тамим бин Ҳамад ат-Таний уч йил ичида биринчи марта Форс кўрфази мамлакатлари саммитига ташриф буюриши ҳақида амир саройи баёнот берди. Тадбир 5 январь куни бўлиб ўтади.
Нашр қайд этишича, Қатарга нисбатан сиёсий бойкотни тўхтатиш Трамп маъмуриятининг Яқин Шарқда Эронга қарши альянс яратиш бўйича режаси бандларидан бири ҳисобланади. Шу муносабат билан Вашингтон 2018 йилдан минтақада ўз дипломатик позицияларини мустаҳкамлашни бошлаган.
2017 йил июнида Баҳрайн, Саудия Арабистони, БАА, Миср, Яман, Ливия муваққат ҳукумати, Мальдив, сўнг эса Мавритания ва Комор ороллари Қатарни террорчиларни қўллаб-қувватлашда ва уларни молиялаштиришда айблаб, у билан дипломатик алоқаларни узган эди. Шундан кейин амирликка қарши иқтисодий санкциялар ва транспорт қамали жорий этилди.
Қатар амири шайх Тамим бин Ҳамад Ат-Таний кейинроқ амирликнинг бойкот қилиниши мамлакат обрўсини тўкиш учун олдиндан режалаштирилганини айтди. Шу билан бирга, у Доҳа Қатарнинг суверенитети ҳисобга олинадиган музокараларга тайёрлигини таъкидлади. Қатар вазият юзасидан афсус билдириб, араб қўшнилари қарорини асоссиз деб атади.
Изоҳ (0)