Buyuk Britaniya bosh vaziri Boris Jonson mamlakatda koronavirus infeksiyasi tarqalishining kuchayishi tufayli yangi milliy lokdaun kiritilishi haqida ma’lum qildi, deb yozadi “RBK”. Bu haqda u xalqqa qilgan murojaatida aytib o‘tdi.
“Virusning yangi varianti qo‘rqitadigan darajada tez tarqalmoqda. Uchinchi milliy lokdaun zarurligi aniq-ravshan”, — dedi Jonson. Uning so‘zlariga ko‘ra, bu koronavirusni nazorat ostiga olib, mamlakatda keng ko‘lamli vaksinatsiyani amalga oshirishga yordam beradi.
Bosh vazirning aytishicha, koronavirusning yangi shtammi tarqalishi hukumatni tashvishga solmoqda. “Bizning COVID-19’ga qarshi kurashdagi jamoaviy harakatlarimiz ish bergan va agar virusning yangi turi chiqmaganida edi, ish berishda davom etgan bo‘lardi”, — dedi Jonson. Uning ta’kidlashicha, yangi shtamm avvalgilaridan 50—70 foizga yuqumliroq ekanligi olimlar tomonidan isbotlanib bo‘lgan. Shu sababli hozir kasalxonalarga butun pandemiya davridagi eng katta yuklama tushmoqda, sog‘liqni saqlash tizimidagi resurslar esa yangi choralar qabul qilmasa, uch haftadan keyin tugab qolishi mumkin.
Cheklovlar 5-yanvar, seshanba kuni kuchga kiradi. Shu kundan Buyuk Britaniyadagi barcha boshlang‘ich va o‘rta maktablar masofadan o‘qishga o‘tadi. Bundan tashqari, hukumat bitiruv imtihonlari jadvalini qayta ko‘rib chiqadi.
Asosiy taqiqlar 6-yanvardan ishga tushadi. Butun mamlakat bo‘ylab majburiy yakkalanish joriy etiladi — fuqarolar faqat ishga borish, oziq-ovqat va eng zarur narsalarni sotib olish, tibbiy yordam olish yoki sport bilzn shug‘ullanish uchungina uydan chiqishi mumkin bo‘ladi.
Boris Jonsonning bayonotidan keyinroq COVID-19 tarqalishi bilan bog‘liq vaziyat yomonlashishi ortidan yaqin uch hafta ichida Buyuk Britaniya Sog‘liqni saqlash vazirligiga yuklama haddan tashqari ortib ketishi xavfi haqida britaniyalik tibbiyot xodimlari bayonot berdi.
Unda aytilishicha, Buyuk Britaniya sog‘liqni saqlash milliy xizmatining ko‘plab qismlari “favqulodda bosim” ostida qolgan. Mamlakatda koronavirus bilan bog‘liq vaziyat yomonlashishi ortidan aholi orasida kasallik tarqalishining yuqori darajalari kuzatilmoqda. COVID-19’ga chalingan bemorlarning katta qismi kasalxona va reanimatsiyalarda davolanmoqda, deyiladi maqolada.
“Buyuk Britaniya sog‘liqni saqlash milliy xizmati kasallanish holatlarining bundan keyin ham barqaror o‘sib borishini ko‘tara olishiga ishonchimiz komil emas va choralar ko‘rilmasa, ba’zi hududlarda kelasi 21 kun ichida Buyuk Britaniya sog‘liqni saqlash milliy xizmati haddan ortiq ‘qizib ketishi’ mumkin”, — deyiladi bayonotda.
O‘z navbatida, Buyuk Britaniya bosh shifokori Kris Uitti o‘z Twitter’ida mamlakatda COVID-19’ning yangi shtammiga chalingan bemorlar soni oshgani haqida xabar berdi.
Izoh (0)