Россия ветеринария ва фитосанитария назорати бўйича федерал хизмати («Росселхознадзор») 2021 йилнинг 1 январидан Ўзбекистоннинг Фарғона вилоятидан қуруқ меваларни олиб киришга рухсат берди. Бу ҳақда идора сайтида маълум қилинди.
Мазкур қарорга Ўзбекистон Вазирлар Маҳкамаси ҳузуридаги Карантин бўйича давлат инспекцияси билан олиб борилган музокаралар натижалари ҳамда ўзбек томонининг кафолати асос қилиб олинган.
Қуритилган меваларни етказиб бериш фитосанитария сертификатларидаги «қўшимча декларация» қисмида ҳамда маҳсулот ёрлиғида мажбурий равишда ишлаб чиқарувчининг номи ва унинг манзилини кўрсатиш орқали амалга оширилади.
Фарғона вилоятидан келтирилган қуритилган меваларнинг ҳар бир партиясига дастлабки электрон билдиришнома ва маҳсулотларнинг фитосанитар хавфсизлигини тасдиқловчи лаборатория синовлари баённомалари илова қилинади.
Эслатиб ўтамиз, «Росселхознадзор» 7 декабрь куни қуритилган ўрик партиясида хавфли зараркунанда — капр қўнғизи аниқлангани сабабли Ўзбекистоннинг Фарғона вилоятидан барча ўсимлик маҳсулотларини олиб киришга тақиқ қўйганди.
Мавзуга доир: «Россия темир йўллари» Ўзбекистондан мева ва сабзавотларни ташиш тарифларини пасайтирмоқда
Изоҳ (0)