Тошкент шаҳридаги Юнусобод метро линияси қурилишида содир бўлган фавқулодда ҳодиса юзасидан жиноят иши жавобгарлик масаласи ҳал этилмасдан тугатилган. Бу ҳақда Тошкент шаҳар прокуратурасига таяниб «Gazeta.uz» хабар берди.
Эслатиб ўтамиз, 2019 йилнинг 18 декабрь куни Юнусобод метросининг янги қурилаётган қисмида тупроқ кўчиши юз берган эди. Бир кундан ортиқ давом этган қидирув-қутқарув ишлари натижасида 6 кишининг жасади тупроқ остидан олиб чиқилди. Ҳалок бўлганларнинг тўрт нафари Қашқадарёдан, яна икки нафари Самарқанддан эди.
Шаҳар прокуратурасининг маълум қилишича, фожиа юзасидан Жиноят кодексининг 257-моддаси (меҳнатни муҳофаза қилиш қоидаларини бузиш) 2-қисми «а» банди, 258-модда (тоғ-кон, қурилиш ёки портлатиш ишлари хавфсизлиги қоидаларини бузиш) 2-қисми «а» банди бўйича жиноят иши қўзғатилган.
«Масъул шахслар ўзларига нисбатан қўзғатилган жиноий ишни айблилик тўғрисидаги масалани ҳал қилмай туриб тугатишни сўраб мурожаат қилишган. Шунингдек, иш берувчи ҳалокатда вафот этганларнинг оила аъзоларига етказилган зарарни қоплаган ва улар томонидан эътирозлар мавжуд эмас. ‘Ўзбекистон темир йўллари’ АЖ бошқарувининг юқоридаги ходимларга берган ижобий тавсифномасини инобатга олган ҳолда 18 март куни Жиноят процессуал кодексининг 84-моддаси (айблилик тўғрисидаги масалани ҳал қилмай туриб жиноят ишини тугатиш учун асослар) 5-қисм 2-бандига асосан жиноят иши тугатилди», — дейилади прокуратура хабарида.
Экспертизаси хулосасига кўра, Юнусобод метроси бекатининг туннели ўнг томонининг темир-бетон конструкцияси қулаб тушганига туннелни очиқ усулда ковлашда техник хавфсизлик қоидаларининг бузилганлиги ва қурилиш ишларининг сифатсиз бажарилганлиги сабаб бўлган. Бу масъул шахсларнинг жараённи етарлича назорат қилмаганлиги натижасида содир бўлган.
- «Кўприк қурилиш инвест» УК 67-рақамли қурилиш отряди бошлиғининг ўринбосари Отабек Алимов;
- отряд иш юритувчиси Саидбек Бобожонов;
- отряднинг қурилиш бўйича устаси Салоҳиддин Ашуров;
- «Тошкент метрополитени» УКнинг «Тошкент метрополитени линияларини қуриш дирекцияси» иш юритиш бўлимининг қурилиш-монтаж ишлари бўйича бош инспектори Баҳодир Муҳаммадраҳимов.
Мавзуга доир: Тошкентда бир йил аввал метро қурилишидаги авария оқибатида олти йигит ҳалок бўлганди. Уларнинг ҳам ўз орзу-ниятлари бор эди
Ҳодиса юзасидан Бош прокуратура томонидан Жиноят кодексининг 257 ва 258-моддалари бўйича жиноят иши қўзғатилган эди.
Айнан шу фожиадан сўнг Юнусободдаги метронинг янги бекатлари очилиши 2019 йил охиридан 2020 йил Наврўзига қолдирилди, Президент Шавкат Мирзиёев эса 2020 йилда ўтказилган илк йиғилишларнинг бирида қурилиш соҳасида меҳнат муҳофазасини кучайтириш бўйича кўрсатма берди.
Изоҳ (0)