Бугун,

  • USD 10940.05
  • RUB 182.26
  • EUR 11121.65

Хитой Халқ Республикаси раиси Си Цзиньпин «Катта йигирмалик» (G20) виртуал саммитида нутқ сўзлаб, «саломатлик кодлари»ни ўзаро тан олиш бўйича халқаро механизм яратишни таклиф қилди, деб ёзади Meduza.

Фото: AP Photo

Фото: AP Photo

Си Цзиньпиннинг инглиз тилига таржима қилиниб, «Sinxua» агентлиги томонидан эълон қилинган нутқи матнида гап «коронавируснинг нуклеин кислотасига нисбатан тестлар натижаларига асосланган, халқаро тан олинадиган QR-кодлар кўринишидаги маркировка» ҳақида бормоқда.

Си Цзиньпин ушбу механизмга нафақат G20 иштирокчилари, балки бошқа кўплаб мамлакатлар ҳам қўшилишига умид билдирди.

«Саломатлик кодлари» халқаро механизми ҳақидаги бошқа тафсилотларга Си Цзиньпин тўхталмади.

Хитойда 2020 йил баҳоридан буён «саломатлик кодлари» тизими амал қилади. Мамлакатдаги ҳар бир одамга коронавирусга топширган тести, эпидемик ҳолат қай даражада бўлган минтақада эканлиги, COVID-19’га чалинганлар билан мулоқотда бўлгани ва бошқа маълумотлар асосида «қизил», «сариқ» ёки «яшил» QR-код берилади. Кўпчилик жойларга фақат «яшил» QR-код талаб қилинади.

Дастлаб бундай кодлар тизими алоҳида ҳудудларда амал қилган бўлса, май ойидан буён бутун Хитой ҳудудига тарқалди.

Си Цзиньпин, шунингдек, COVID-19’га қарши вакцина дунёнинг барча халқларига етиб бориши учун бор имкониятини ишга солишини айтди. Коронавирусга қарши вакцина билан барча мамлакатларни таъминлаш зарурияти ҳақида G20 саммитида қатнашган Россия президенти Владимир Путин ҳам таъкидлаб ўтди. «Бизнинг олимларимиз томонидан ишлаб чиқилган вакциналарни эҳтиёжманд мамлакатларга етказиш»га Россия тайёр, — деди Путин.

Умуман, «Катта йигирмалик» (G20) мамлакатлари етакчилари коронавирусга қарши вакциналар, зарур дори воситалари ва тестлар бутун дунё бўйлаб одилона тақсимланишини таъминлашга, шунингдек, ночор мамлакатларни пандемия билан курашда қўллаб-қувватлашга ваъда берди. Бу ҳақда «йигирмалик» коммюникеси лойиҳасида айтилади.

G20 етакчилари пандемия бойлар ва камбағаллар ўртасидаги фарқларни янада кучайтиришидан хавотирда. «Бадавлатроқ одамларгина ўзини вирусдан ҳимоя қила оладиган вазиятга нима қилиб бўлса ҳам, тушмаслигимиз керак», — деди Франция президенти Эммануэль Макрон онлайн саммитда.

Бунинг учун Евроиттифоқ G20’ни Жаҳон соғлиқни сақлаш ташкилотининг «COVID-19’га қарши воситалардан фойдаланиш имкониятини тезлаштириш» лойиҳасига инвестиция киритишга чақирди, у касалликни ташхислаш ва даволаш технологияларини ишлаб чиқишни тезлаштиришга қаратилган. Еврокомиссия раҳбари Урсула фон дер Ляйен фикрича, йил охиригача ташаббусга 4,5 миллиард доллар киритиш керак.

Ҳозирда Россия, АҚШ, Хитой, Франция, Буюк Британия ва бошқа мамлакатлар ўз вакциналарини ишлаб чиқмоқда.

Ноябрь ойининг бошида Pfizer ва BioNTech ўзларининг BNТ162b2 вакцинаси учинчи босқич синовларида 90 фоиз самара кўрсатганини эълон қилди. Бир ҳафта ўтгач компаниялар вакцинанинг самарадорлиги 95 фоиз эканлигини маълум қилди. Америка фонд биржалари Pfizer/BioNTech вакцинасининг самарадорлиги тўғрисидаги хабарларга индексларнинг рекорд даражада ўсиши билан муносабат билдирди, масалан, авиакомпанияларнинг қимматли қоғозлари қимматлашди, Zoom акциялари эса аксинча, пасайиб кетди.

Шунингдек, ноябрь ойида Американинг Moderna компанияси ўзининг янги коронавирусга қарши вакцинаси синовларнинг учинчи босқичида 94,5 фоиз самарадорлик кўрсатгани ҳақида хабар берди. Россиянинг «Sputnik V» вакцинасини ишлаб чиқарувчилар эса ўзларининг вакцинаси самарадорлигини 92 фоизга баҳолади.

Изоҳ
Асосий янгиликлар