Туркия ҳарбий кучларини Озарбайжонга жўнатишга тайёрланмоқда

Туркия Озарбайжонга ўз қўшинларини юборишни бошлайди, дея хабар бермоқда Туркия мудофаа вазири Ҳулуси Акарга таяниб «Интерфакс».

«Яқин келажакда туркиялик ҳарбийлар Озарбайжонга жўнаб кетади. Туркия қуролли кучларининг қуруқликдаги кучлари машғулотларини якунлади», – деб вазирнинг сўзларини келтирган Anadolu агентлиги.

Ноябрь ойида мамлакат парламенти Туркия ҳарбийларини Озарбайжонга жўнатишни назарда тутувчи қонунни маъқуллади.

Ушбу ҳарбий хизматчилар Россия билан биргаликда тузилаётган Тоғли Қорабоғ можароси зонасида ўт очишни тўхтатиш режимига риоя этилишини назорат қилиш бўйича марказ ишига жалб этилиши тахмин қилинмоқда. Мандат муддати бир йил этиб белгиланган.

Озарбайжон ҳудудига Туркия қуролли кучларини юбориш ҳақидаги меморандум лойиҳаси 16 ноябрь куни кўриб чиқиш учун киритилган эди. Ҳужжатга кўра, ҳарбийлар бир йил мобайнида Боку ва Ереван ўртасидаги ўт очишни тўхтатиш режимига риоя қилиниши устидан назорат олиб боради.

Ҳукуматнинг қайд этишича, низо ҳудудига ҳарбийларни жўнатиш Туркия миллий манфаатларига мувофиқ келади.

Шу билан бирга, Россия ташқи ишлар вазири Сергей Лавровнинг сўзларига кўра, Туркия тинчликпарварлари Тоғли Қорабоғ ҳудудига кирмайди. Туркия фақатгина Озарбайжон ҳудудида туриб вазиятни кузатади, дея аниқлик киритганди Лавров.