АҚШнинг Moderna компанияси COVID-19’га қарши ўз вакцинасининг ҳар бир дозасини 25-37 долларга баҳолади

Американинг Moderna фармацевтика компаниясининг коронавирус инфекцияси қарши вакцинаси ҳар битта дозаси 25 доллардан 37 долларгача бўлади. Бу ҳақда компания раҳбари Стефан Бансель Германиянинг Welt газетасига маълум қилди, деб ёзади «РБК».

Унинг сўзларига кўра, якуний нарх буюртмачига зарур бўлган партия ҳажмига боғлиқ бўлади. «COVID-19’га чалинган оғир беморларни даволаш соғлиқни сақлаш тизимига қанчага тушаётганини ҳисобга олганда, бу адолатли нарх. Биз максимал даромад олишга қизиққанимиз йўқ», — дея аниқлик киритди Бансель.

Moderna раҳбари айтишича, ҳозир компания дорини Европага етказиб бериш ҳақида Еврокомиссия билан музокаралар олиб бормоқда. «Биз Европани таъминлашни истаймиз ва конструктив музокаралар олиб боряпмиз», — деди Бансель вакцинани етказиб бериш ҳақида шартнома имзолашга бир неча кун қолганини қўшимча қилар экан.

Банселнинг таъкидлашича, музокараларнинг асосий жиҳатларидан бири вакцинани захира қилиш учун тўлов ҳисобланади. Йил охиригача компания 20 миллионта доза ишлаб чиқармоқчи, шунинг бир қисми Европага етказилади.

Ноябрь ўрталарида Moderna компанияси унинг коронавирусга қарши вакцинаси синовларнинг учинчи босқичида 94,5 фоиз самарадорлик кўрсатганини эълон қилганди. Синовларнинг учинчи босқичи 30 минг кишида амалга оширилган. Вакцинанинг иккинчи дозаси қабул қилинганидан икки ҳафта ўтгач, тадқиқот иштирокчиларининг 95 нафари коронавирус билан касалланган, уларнинг 90 нафари плацебо ва беш нафари вакцина қабул қилган.

АҚШнинг Pfizer компанияси Германиянинг BioNTech компанияси билан биргаликда ишлаб чиқарилган COVID-19‘га қарши вакцинанинг самарадорлиги 95 фоизни ташкил этишини маълум қилди. Компания маълумотларига кўра, вакцина синовда қатнашаётган кишининг ёши, ирқи ва миллатидан қатъий назар, самарали бўлган. Дастлабки синов натижалари 90 фоиз самарадорликни кўрсатганди.

«Чегара билмас шифокорлар» ташкилоти (МСФ) эса АҚШнинг Moderna компанияси томонидан яратилган коронавирусга қарши вакцина ҳақидаги маълумотни умид берувчи деб атади. Бироқ ташкилот томонидан қайд этилишича, компания томонидан берилган маълумотлар аниқ хулосалар қилиш учун етарли эмас.