Дунёда коронавирусга чалинганлар сони 58 миллион кишидан ошди, деб ёзади «Коммерсантъ» Жонс Ҳопкинс университети маълумотларига таяниб. 1,38 миллион киши вирусдан вафот этган. 11 та мамлакатда беморлар сони 1 миллиондан ошган.
Касалланганлар сони бўйича етакчи бўлган мамлакатлар қуйидагилар:
- АҚШ — 12,1 миллион;
- Ҳиндистон — 9,05 миллион;
- Бразилия — 6 миллион;
- Франция — 2,2 миллион;
- Россия — 2,05 миллион.
Жаҳон соғлиқни сақлаш ташкилоти маълумотларига кўра, сўнгги бир ойда дунё бўйича аниқланган касалланиш ҳолатлари пандемиянинг илк олти ойи давомида аниқлангандан кўра кўпроқдир. Сўнгги икки ҳафта мобайнида ташкилот бир ҳафта учун рекорд даражадаги касалланиш ҳолатларини қайд этди. АҚШда эса бир ҳафтада 1 миллиондан зиёд коронавирусга чалиниш ҳолати аниқланди.
АҚШда пандемия бошидан буён COVID-19’га чалинганлар сони 12 миллион кишидан ошиб кетди. 22 ноябрь ҳолатига кўра, мамлакатда 12 миллион 38 минг бемор аниқланган. 255,5 минг киши вафот этган. АҚШ касалликлар назорати ва профилактикаси маркази прогнозига кўра, декабрь ўрталарига келиб, АҚШда коронавирусдан вафот этганлар сони 298 минг кишига етиши мумкин.
Worldometers’га кўра, АҚШда касалланиш даражаси бўйича Техас биринчи ўринда бормоқда, ундан кейинда — Калифорния. Иккала штатда ҳам 1,1 миллиондан ортиқ киши касалликни юқтирган. Шунингдек, беморлар сони бўйича юқори бешликка Флорида (931,8 минг), Иллинойс (646,2 минг) ва Нью-Йорк (623,2 минг) киради.
Изоҳ (0)