Тожикистонда 390 мингдан ортиқ кам таъминланган оилалар, ёлғиз кексалар, ногиронлар, етимлар ва қаровсиз болалар, шунингдек, ёрдамга муҳтож чет элликлар – қочқинларга бир марталик манзилли ижтимоий нафақалар тўланди. Бу ҳақда Asia-Plus хабар қилди.
Ёрдам президентнинг «COVID-19 юқумли касаллигининг Тожикистоннинг ижтимоий-иқтисодий соҳаларига таъсирининг олдини олиш тўғрисида»ги фармони доирасида бюджет маблағлари ҳисобидан амалга оширилди.
Маълум қилинишича, 2020 йилнинг 17 ноябрига қадар бир марталик моддий ёрдам кўрсатиш учун 175 миллион сомонийга яқин (ўртача йиллик ставка бўйича тахминан 15 миллион доллар) маблағ ажратилди, шундан 156 миллион сомонийдан зиёдини муҳтожлар қабул қилиб олган.
Мавзуга доир: Пандемия Ўзбекистонда камбағал оилалар сонининг ортишига олиб келди — БМТ Тараққиёт дастури
Тегишли вазирлик ва идоралар томонидан тайёрланган рўйхатга кўра, 437,4 мингга яқин кам таъминланган оилалар, ёлғиз кексалар, ногиронлар, етим болалар, қаровсиз қолган болалар ва кам таъминланган чет эл фуқароларига бир марталик манзилли ёрдам кўрсатилмоқда.
Маълумот учун, «COVID-19 юқумли касаллигининг Тожикистоннинг ижтимоий-иқтисодий соҳаларига таъсирининг олдини олиш тўғрисида»ги фармон президент томонидан 2020 йил 5 июнда имзоланган.
«Давлат бюджетининг захира маблағлари ва бюджетдан ташқари жамғармалари ҳисобидан аҳолининг заиф қатламларига, шу жумладан 1941–1945 йиллардаги Иккинчи жаҳон уруши қатнашчиларига, ижтимоий нафақа олаётган фуқароларга, ногиронларга, етим болаларга, қаровсиз қолган болаларга, кам таъминланган оилаларга энг кам иш ҳақи миқдорида бир марталик ёрдам тақдим этилади», – дейилади ҳужжатда.
Мавзуга доир: Тожикистонда коронавирус пандемияси сабабли Янги йил билан боғлиқ барча тадбирлар бекор қилинди
Унга кўра, ҳар бир кам таъминланган оилага йиллик нафақа 464 сомоний қилиб белгиланди. Бундай имтиёзлар «Амонатбанк» бўлинмалари орқали ҳар чоракда 116 сомоний миқдорида тўланади.
Аввалроқ Тожикистонда таҳсил олаётган ўзбекистонлик талабаларнинг мамлакатга киришига рухсат берилгани ҳамда Тошкент ва Душанбе ўртасидаги авиақатновларни тиклаш 2021 йил бошига қолдирилгани ҳақида хабар берилганди.
Изоҳ (0)