Андижон вилояти ИИБ ЙҲХБ ЙПХО 2-сафарбарлик гуруҳи командири, капитан У.Мадумаров Бўстон тумани ҳудудида мол ўғрисини қўлга олди. Бу ҳақда ЙҲХББ ахборот хизмати хабар қилган.
Хабарга кўра, 2020 йил 29 октябрь куни Бўстон тумани «Боғи эрам» МФЙда яшовчи 1986 йилда туғилган фуқаро Т.О ариза билан ички ишлар органларига мурожаат қилган. У бир кун олдин ўзи ишлайдиган «Ойбек-2» фермер хўжалиги дала шийпони молхонасидан бозор нархи 6 миллион сўмлик бир бош қора молини номаълум шахслар ўғирлаб кетганлиги ҳақида хабар берган.
Шу куни соат 20:30 ларда Андижон вилояти Олтинкўл тумани «Ижтимоят» МФЙ ҳудудидан ўтган 4-Р-112 Фарғона ҳалқа йўлининг 138 километрида хизмат олиб бораётган капитан У.Мадумаров йўл четида мол етаклаб кетаётган шубҳали шахсни кўриб қолган. Кейинчалик мол етаклаган кишининг Қўрғонтепа туманида яшовчи 1991 йилда туғилган муқаддам судланган Ҳ.М исмли фуқаро эканлиги ойдинлашган.
Ҳ.М. ўзини шубҳали тутганлиги сабабли олиб борилган суриштирув ишлари давомида ушбу қора молни ўғирлаб кетаётганлиги маълум бўлган. Капитан Мадумаров гумонланувчини туман ИИБга топширган.
Мазкур ҳолат юзасидан Бўстон тумани ИИБ ҳузуридаги Тергов бўлими томонидан тергов ҳаракатлари олиб борилмоқда, дейилади ЙҲХББ хабарида.
Изоҳ (0)