Қашқадарё вилоятида яна иккита туман пахта топшириш режасини ортиғи билан бажариб, давлат олдидаги мажбуриятини бажарди, дея хабар берди «Дарё» мухбири.
Хабар берилишича, Касби туманидан сўнг ғузорлик пахтакорлар вилоятда иккинчи бўлиб, жорий йилги пахта топшириш шартномавий режасини бажарган. Туман пахтакорлари 15 минг 700 тоннадан ортиқ пахта хирмони бунёд этган.
«Халқимизда ‘Ерни боқсанг, ер ҳам сени боқади’, деган мақол бежиз айтилмаган. Соҳада катта натижага эришиш учун биринчи навбатда ризқ-рўзимиз манбайи бўлган ерни боқишимиз, тупроқ унумдорлигини оширишимиз зарур. Туман ҳокими бошчилигида биз ана шу муҳим тадбирларга алоҳида эътибор қаратдик. Шунингдек, ерларнинг мелиоратив ҳолатини яхшилаш борасидаги ишлар ҳам ўзининг самарасини бера бошлади», — дейди туман ҳокимининг қишлоқ ва сув масалалари бўйича ўринбосари Завқиддин Бўриев.
Ғузор туман ҳокимлиги ахборот хизматининг аниқлик киритишича, туманда пахта йиғим-теримини тизимли ташкил этиш бўйича 96 та терим отряди шакллантирилиб, уларга 11 минг нафардан ортиқ теримчилар ихтиёрий равишда бириктирилган.
Вилоятда учинчи бўлиб пахта топшириш режасини бажарган туман Муборак тумани бўлиб, ҳудуд пахтакорлари давлатга 25 минг тонна оқ олтин топшириб, шартномавий режани 100,3 фоизга бажарган. Вилоятнинг бу борадаги кўрсаткичи эса 88 фоизга етган.
Айтилишича, тумандаги пахта йиғим-теримида 9 мингдан ортиқ теримчи иштирок этган.
Эслатиб ўтамиз, аввалроқ вилоятнинг Косон туманида яшовчи оила 38 кун пахта териб, 41 миллион сўм даромад қилгани, вилоят раҳбари Зоир Мирзаев эса теримчи оилага махсус совға ваъда қилгани ҳақида хабар берилганди.
Изоҳ (0)