Беларусда нима гап? 24 августнинг асосий воқеалари

Бугун Беларусда 9 августдан буён давом этаётган норозилик намойишларининг 16-куни. Бугун бўлиб ўтган энг муҳим воқеалар ҳақида танишиб чиқсак.

Шунингдек, бугун МТЗ – Минск трактор заводи кириш дарвозаси ёнида мухолифатнинг Мувофиқлаштирувчи кенгашининг икки нафар аъзоси – Ольга Коваленко ва Сергей Дилевскийлар ҳибсга олинди.

Улар ноқонуний митингларни ташкил этишда айбланмоқда. Кенгашнинг «Интерфакс»га берган маълумотига кўра, уларга нисбатан маъмурий ҳуқуқбузарлик бўйича иш очилган ва жарима қўлланилиши мумкин.

Шунингдек, бугун мухолифатнинг Мувофиқлаштирувчи кенгашининг матбуот анжумани бўлиб ўтди.

Унда сўзга чиққан пресидиум аъзоси Павел Латушко ўзига нисбатан хориждан таҳдидлар бўлаётганини айтиб ўтди.

«Хориждан янгидан янги таҳдидлар бўлмоқда. Дўстларим, яқинларим орқали таҳдидлар қилган. Нима қила олардим… Бу ҳар куни бўлади, интернет орқали, Telegram орқали», деди Латушко журналистлар билан суҳбатда.

Аммо у қайси давлатлардан таҳдид бўлаётганини очиқламаган. Шу билан бирга, таҳдидларнинг жиддий эканини ҳам таъкидлади.

Шунингдек, матбуот анжуманида Латушко мухолифатнинг Россия билан ҳар қандай даражадаги мулоқотларга тайёрлигини маълум қилди.

Унинг фикрича, Россияда Беларусь мухолифати ҳақида учинчи манбалар мавжуд эмас. «Ана ўшандагина маълумотлар ишончлилиги ҳақида гапириш мумкин, аммо биз билан ҳеч ким алоқа боғлагани йўқ», дея таъкидлади Латушко.

Матбуот анжуманини қуйидаги видеода томоша қилишингиз мумкин:

Бугун Беларусь президенти Александр Лукашенко мамлакатдаги ўқитувчилар ҳақида гапирди. Унинг сўзларига кўра, «мамлакат идеологиясига мос бўлмаган ўқитувчилар мактабларда ишламаслиги керак».

«Ушбу принципларга амал қиладиганларга меҳрибонлик билан айтамиз: боринг, ишланг, таълим беринг, ўқитинг. Хоҳламайдиганлар бўлса, уларнинг жойи мактабда эмас. Буни очиқ-ойдин айтиш керак», дея унинг сўзларидан иқтибос келтиради «БелТА» нашри.

Беларусь таълим вазирлиги август ойида бир неча бор ўқитувчиларга таҳдидлар бўлаётгани ҳақида маълумот берди.

Вазирликнинг Telegram-каналида эса ўқитувчиларга таҳдидлар акс этган суратлар эълон қилинди.

Бугун Беларусь ТИВ Литва элчисига мамлакат ҳаво ҳудудининг Литва томонидан бузилгани юзасидан нота йўллади.

Беларусь Мудофаа вазирлиги маълумотига кўра, кеча, 23 август куни Литва ҳудудидан давлатга қарши размлари бўлган бир нечта ҳаво шари Беларусь ҳудудига 3 километр кириб борди. Вазирлик маълумотига қараганда, вазият қурол ишлатилмасдан ҳал қилинди.

Шунингдек, бугун Мувофиқлаштирувчи кенгаш Беларусь президентининг вояга етмаган ўғли Николай Лукашенконинг қўлидаги қурол юзасидан текширув ўтказишни талаб қилди.

«Вояга етмаганларнинг қўлига ҳарбий қуролларнинг бўлиши тегишли органларни сергак торттириши керак ва биз бунга эътибор қаратилишини сўраймиз», дея маълум қилди президиум аъзоси Мария Колесникова журналистлар билан бўлган суҳбатда.

Куни кеча, 23 август куни ўтган оммавий намойишлар пайтида Николай Лукашенко ҳарбий либосда қўлида қурол билан отасининг ёнида кўриниш берган видеолар тарқалган эди.