Россияда ишлаб чиқариладиган коронавирусга қарши вакцинани биринчи бўлиб оладиган хорижий давлат Беларусь бўлади. Мазкур масала Россия президенти Владимир Путин ва Беларусь президенти Александр Лукашенко ўртасида бўлиб ўтган телефон орқали мулоқотда муҳокама қилинган. Бу ҳақда «Белта» хабар берди.
Маълум қилинишича, президентлар Беларусдаги ички вазиятни ва Ғарб мамлакатлари билан муносабатларни муҳокама қилган.
Қайд этилишича, давлат раҳбарлари коронавирусга қарши кураш масаласини ҳам муҳокама қилган. Президентлар Россияда яратилган вакцина синовларининг учинчи босқичида беларусликлар кўнгилли сифатида иштирок этиши юзасидан келишиб олди. Шунингдек, Беларусь мазкур вакцина етказиб бериладиган биринчи мамлакат бўлади.
Эслатиб ўтамиз, Россиянинг Гамалея институти томонидан яратилган вакцина 11 август куни вақтинчалик рўйхатдан ўтиш гувоҳномасини олди. Вакцина тўлиқ самарадорлик тадқиқотини ўтказиш шарти билан рўйхатдан ўтказилган ва гувоҳнома 2021 йил 1 январга қадар амал қилади. Россияда коронавирусга қарши ушбу вакцинани оммавий қўллаш октябрь ойидан бошланади.
Изоҳ (0)