Грузиянинг Душети муниципалитетида микроавтобус жарликка қулаб кетиши оқибатида 17 киши ҳалок бўлди. Бу ҳақда мамлакат Ички ишлар вазирлиги хабар берди.
Шунингдек, яна уч киши жиддий жароҳат олган бўлиб, шифохонага ётқизилган.
Авария Бисо қишлоғи яқинида содир бўлган, автобус салкам 80 метрли баландликдан тушиб кетган. Хабарда таъкидланишича, фожиа мураккаб рельефли жойда, ноқулай об-ҳаво шароитида юз берган. Авария жойига полиция, ўт ўчирувчилар ва қутқарувчилар, шунингдек, махсус техникалар йўл олган.
Ички ишлар вазири ўринбосари Иосеб Челидзе ва Фавқулодда вазиятлар агентлиги раҳбари Темур Мгебришвили ҳозирда ҳодиса жойида бўлиб турибди. Улар қутқарув операциясини мувофиқлаштиряпти.
ИИВнинг маълум қилишича, ҳолат юзасидан Жиноят кодексининг 276-моддаси (йўл ҳаракати хавфсизлиги ёки транспорт воситаси эксплуатациясини бузиш) билан жиноят иши қўзғатилган.
Изоҳ (0)