24 август куни эрталаб Дамашқда газ қувури портлади. Бунинг оқибатида бутун мамлакат бўйлаб электр энергияси таъминоти узилиб қолган, деб хабар беради SАNА агентлиги.
Сурия электр энергетика вазири Муҳаммад Зухар Ҳарбутлийнинг сўзларига кўра, портлаш оқибатида учта электростанция иши тўхтаб қолган. Ҳозирда пойтахт марказида электр энергияси қайта тикланган. Ҳукумат бир неча соат ичида мамлакатнинг бошқа туманларида кузатилаётган носозликларни бартараф этишга ваъда бермоқда.
Сурия нефть ва минерал ресурслар вазири Али Ғанимнинг маълум қилишича, ҳукумат газ қувурининг портлашини теракт деб баҳоламоқда. Ҳозирча жабрланганлар ва ҳалок бўлганлар ҳақида маълумот йўқ.
«Вазиятни баҳолашдан кейин маълум бўлдики, Адра ва Думайр туманлари орасидан ўтувчи газ қувуридаги портлаш террорчилик акти сабаб юзага келган», — дейди вазир.
Изоҳ (0)