23 август куни Литва пойтахи Вильнюсда ўн минглаб инсонлар Александр Лукашенкога қарши норозилик намойиши ўтказаётган беларусларга бирдамлик рамзи сифатида Беларусь чегараларига қадар тирик занжир ҳосил қилди. Бу ҳақда Baltic News Service хабар берди.
«Озодлик йўли» номини олган акция «Болтиқ йўли»нинг 31 йиллиги муносабати билан ўтказилган. 1989 йилнинг 23 август куни Болтиқ давлатларининг мустақиллиги учун ўтказилган оммавий ҳаракатлар вақтида икки миллионга яқин инсон — Литва, Латвия ва Эстония аҳолиси — Вильнюсдан Рига орқали Таллинга қадар тирик занжир ҳосил қилган эди.
Маълумотларга кўра, 23 август куни 50 мингга яқин инсон Вильнюсдан Беларусь чегарасидаги Мядининкай қишлоғига қадар 32 километрли тирик занжир ҳосил қилган. Акцияда Литва президенти Гитанас Науседа, мамлакат собиқ президентлари Валдас Адамкус ва Даля Грибаускайте, шунингдек, сейм раиси Викторас Пранскетис, сейм (парламент) аъзолари ва мэрлар иштирок этган.
«30 йил олдин Литва зўравонлик кишанларини ечиб, қардош лат ва эстонлар билан ‘Болтиқ йўли’га турган ва бутун дунёга озод эканлигини, биринчи навбатда, руҳан озодлигини маълум қилган. Бугун Озодлик номини айтиш навбати беларус биродарларимизга келди», — дейди Гитанас Науседа.
Мавзуга доир:
Беларусь милицияси сайлов участкалари олдида тўпланган одамларни қўлга олди. Сайлов куни оқшомида мамлакатнинг барча етакчи оммавий ахборот воситаларининг сайтлари очилмай қолди. Пойтахт Минскда президент сайловидан кейин норозилик намойиши бошланди. Шундан буён мамлакатда норозилик намойишлари ва намойишчиларни қўллаб-қувватлаш учун чиқишлар давом этмоқда.
Изоҳ (0)