Германия ҳукумати россиялик сиёсатчи Алексей Навальний катта эҳтимол билан заҳарланган, деб ҳисобламоқда. Бу ҳақда мамлакат ҳукуматининг расмий вакили Штеффен Зайберт маълум қилди, деб ёзмоқда Meduza.
Зайбертнинг таъкидлашича, Германия ҳукумати расмий даражада Навальнийни таклиф қилмаган, бироқ унинг мамлакатга олиб келинишига ёрдам берган.
Алексей Навальний 20 август куни Томскдан Москвага учаётган самолётда аҳволи ёмонлашганидан буён комада. Унинг яқинлари сиёсатчи заҳарланган, деб тахмин қилмоқда.
Навальний қарийб икки сутка давомида Омксдаги клиникада ётди, шундан сўнг у Берлинга олиб кетилди. Омскдаги клиника шифокорлари икки сутка давомида уни олиб кетишга рухсат беришдан бош тортди ва буни беморнинг аҳволи барқарор эмаслиги билан тушунтирди. Навальнийнинг яқинлари фикрича, бу иш атайлаб, унинг организмидаги заҳарли модда изларини йўқотиш учун қилинган.
Навальнийга қўйилган ташхис ҳалигача номаълум. Омскдаги клиника шифокорларининг маълум қилишича, ташхис беморнинг қариндошларига тушунтирилган, унинг таҳлил натижаларида заҳарли моддалар аниқланмаган.
Изоҳ (0)