Беларусда нима гап? 21 августнинг асосий воқеалари

9 август куни Беларусда бўлиб ўтган президентлик сайловлари натижасида бошланган норозилик намойишлари илк ҳафтадагидан кўра анча сокинлашиб қолди. Намойишлар илк кунлардагидек оммавий тус олмаяпти. Иш ташлашлар ҳам сокинлашиб қолди. Шундай шароитда ўтган воқеаларнинг 13-кунидаги асосий воқеалар таҳлилига ўтсак.

Аввалроқ Светлана Тихановскаянинг ўзи ҳам видеомурожаат йўллаб, Беларусдаги ишчиларни иш ташлашда давом этишга чақирган эди.

Шунингдек, бугун Светлана Тихановская ўзининг Литвага чиқиб кетганидан буён илк матбуот анжуманини ўтказди. Матбуот анжуманида у мамлакатга қайтишини билдирди:

«Мен ватанимни жуда қаттиқ севаман ва у ерга қайтишни жуда хоҳлайман. Мен у ерга ўзимни хавфсиз ҳис қилган тақдирдагина қайтишим мумкин», деб айтиб ўтди у анжуман давомида.

Шунингдек, у мамлакатдан чиқиб кетиши олдидан қандай таҳдидларга учрагани ҳақидаги саволларга жавоб беришдан бош тортди ва буни муҳокама қилишни истамаслигини билдирди.

«Менинг юртдан чиқиб кетишим олдидан нималарга тўқнашганимни ва менга қандай таҳдидлар бўлганини муҳокама қилишни хоҳламайман. Москва мен билан боғланмаган».

Матбуот анжуманининг тўлиқ шаклини қуйида томоша қилишингиз мумкин.

20 август куни Беларусь прокуратураси мухолифатнинг Мувофиқлаштирувчи кенгашига нисбатан «ҳокимиятни эгаллаш» моддаси бўйича жиноий иш очилгани ҳақида хабар берган эди. Ушбу иш доирасида бугун кенгашнинг уч нафар аъзоси – юрист Максим Знак, собиқ дипломат Павел Латушко ва МТЗ иш ташлаш қўмитаси раиси Сергей Дилевскийлар сўроқ қилишга чақирилди.

Тергов идорасига олиб борадиган йўллар одамлардан тозаланди.

Терговдан чиққан Максим Знак барча саволларга жавоб берганини, суҳбат конструктив ўтганини айтди.

Сергей Дилевский эса иш ташлашда қатнашганларга ёрдам ко’рсатилиши ҳақида уни қўллаб-қувватлашга келганларга маълумот берди.

Шунингдек, бугун Беларуснинг амалдаги раҳбари Александр Лукашенко Фаниполе шаҳридаги Дзержинский комбинатига ташриф буюрди.

«БелТА» нашрининг ёзишича, унга бу ерда иш ташлашлар бўлмаётгани ҳақида маълумот беришган ва шундан кейин у комбинатга боришга қарор қилган экан.

Ташриф давомида Лукашенко мамлакатдаги вазият унинг «муаммоси» эканини ва уни тез орада «ҳал қилишини» айтди.

Ташриф давомида президент, шунингдек, Беларусь телерадиокомпанияси ходимларининг иш ташлаши ҳақида ҳам фикр билдирди ва улар ўрнига Россияда мутахассислари жалб қилганини айтди.

«Россияликлардан ҳар эҳтимолга қарши икки-учта журналистлар гуруҳи юборишларини сўрадим. Бу 6-9 одам дегани».

У бунинг учун уларга пул тўламаслигини қўшимча қилди.

Бугун КГБ ҳибсга олган «Беларускалий» заводи ишчиси Дмитрий Куделевич қочиб, Украинага ўтиб кетганини маълум қилди.

Маълум бўлишича, у КГБ идорасидан ҳожатхонага чиқиб келиш баҳонаси билан чиқиб, у ердаги очиқ турган дераза ойнасидан қочиб кетишга муваффақ бўлибди.

У Украинадан туриб видеомурожаат йўллади.