Алексей Навальний ётган Омск шаҳридаги 1-сонли касалхона бош шифокори сиёсатчини Германиядаги клиникага кўчиришга рухсат беришдан бош тортди. Бу ҳақда Навальнийнинг матбуот котиби Кира Ярмиш ўзининг Twitter’даги саҳифаси орқали маълум қилди.
Ярмишнинг сўзларига кўра, Навальнийни бошқа касалхонага кўчиришга қўйилган тақиқ унинг ҳаётига хавф туғдирмоқда. «Омскдаги шифохонада ташхис қўйилмаган ва керакли ускуналарсиз қолиш — ҳозирги вазиятда ҳалокатли», — деб ёзади Ярмиш. У шифокорлар томонидан қўйилган тақиқни Навальнийнинг «ҳаётига суиқасд» деб атаган. Матбуот котибининг фикрича, мазкур қарорни шифокорлар эмас, балки Кремль қабул қилган.
Коррупцияга қарши кураш фонди директори Иван Ждановнинг маълум қилишича, шифокорлар дастлаб Навальнийни Германиядаги клиникага кўчириш бўйича керакли ҳужжатларни тайёрлаган, бироқ кейинроқ худди уларни «алмаштириб қўйишгандек». Ждановнинг таъкидлашича, сиёсатчини кўчириш учун барча зарурий ҳужжатлар тайёр бўлган.
Аввалроқ россиялик сиёсатчи Алексей Навальнийнинг аҳволи Томск—Москва йўналиши бўйича учаётган рейс вақтида оғирлашиб қолгани ва самолёт фавқулодда Омскка қўнгани тўғрисида хабар берилганди. Навальний заҳарланган бўлиши мумкин.
Изоҳ (0)