Microsoft асосчиси Билл Гейтс дунёда экологик инқироз содир бўлиши мумкинлиги ва унинг зарари коронавирус пандемиясидан ҳам кучли экани ҳақида пост ёзди.
Гейтс прогнозига кўра, бутун дунё яқин ўн йилликда иқлим ўзгаришлари туфайли жаҳон миқёсидаги инқирозга дуч келади.
«Пандемия қанчалик даҳшатли бўлмасин, иқлим ўзгаришлари бундан-да, хавфлироқ таъсир кўрсатиши мумкин», — деб ёзган миллиардер ўз шахсий блогида.
Гейтснинг фикрича, фалокатнинг олдини олиш учун атмосферага чиқаётган иссиқхона эффекти газ чиқиндиларини камайтириши лозим.
Microsoft асосчиси экологик инқироз зарарини коронавирус пандемияси билан қиёслади. Инфекция асоратларидан ўртача 100 000 минг аҳолидан 14 киши вафот этган. Тадбиркорнинг тахмини бўйича яқин 40 йил ичида Ер юзида ҳароратнинг кўтарилишидан кузатиладиган ўлимлар сони худди шундай қолиб, ўзгармаслиги мумкин, 2100 йилда эса ушбу кўрсаткичдан беш баравар кўп бўлади.
Миллиардер иқлим ўзгаришларига қарши ҳозирдан курашишга чақирди. Жумладан, у фан ва инновацияни атмосферага чиқаётган чиқиндиларни назорат қилиш учун жалб қилиш ташаббусини билдирган. Билл Гейтс ривожланаётган давлатларда ҳам эклогик муаммоларга қарши кураш олиб борилиши муҳимлигини таъкидлаган. Унинг айтишича, одамларда вақт қолмаган ва бугуннинг ўзида зарур чораларни кўриш шарт.
«Соҳада тоза энергияга эга бўлиш, бунинг учун муҳим ташаббусларни амалга ошириш ва ишлаб чиқишга камида ўн йил вақт талаб этилади», — деган Microsoft асосчиси.
Гейтс аввал ҳам келажакда дунё глобал инқирозга дуч келиши мумкин, унинг оқибатлари коронавирус пандемиясидан ҳам ёмонроқ бўлиши ҳақида огоҳлантирган.
Изоҳ (0)