Самарқанд вилоятида Миллий гвардияга ишга киритиб қўйишни ваъда қилиб, ўзганинг 27 минг 200 доллар миқдоридаги пулларни қўлга киритган фуқаро фирибгарликда айбланмоқда. Бу ҳақда «Дарё»га вилоят ИИБ ахборот хизмати маълум қилди.

Маълумот берилишича, 2020 йилнинг 17 август куни 20 ёшли фуқаро С.Б. Самарқанд вилоят ИИБга ариза билан мурожаат қилиб, Ургут туманида яшовчи таниши У.Ш. уни Миллий гвардиянинг Самарқанд вилоят бошқармасига ишга жойлаштириб қўйишини айтганини, аммо алдаб келганини маълум қилган.

Шикоятчи С.Б. 2020 йилнинг январь ойидан июль ойи охирига қадар таниши У.Ш.га 27 минг 200 доллар пул берганини, эвазига У.Ш. Миллий гвардиянинг вилоят бошқармасида ишловчи юқори лавозимли «Л» исмли таниши орқали уни Миллий гвардияга ишга жойлаб қўйишини ваъда қилганини маълум қилган. Шунингдек, 27 минг 200 доллар пулни олган таниши ишни бажариш учун яна 300 доллар сўраётганини баён қилган. Ҳамда У.Ш. ва «Л» исмли шахсларга нисбатан қонуний чора кўришни сўраган.

Фуқаро С.Б.нинг аризасига асосан 2020 йил 17 август куни Самарқанд вилоят ИИБ ЖҚБ Коррупция ва иқтисодий жиноятларга қарши курашиш бўлими, Каттақўрғон туман ИИБ ҳузуридаги Тергов бўлими ва Миллий гвардиянинг Самарқанд вилоят бошқармаси ходимлари ҳамкорлигида тезкор тадбир ўтказилган. Тадбирда Ургут шаҳрида яшовчи 22 ёшли У.Ш. ариза муаллифи С.Б.дан 300 доллар пулни олган вақтда ашёвий далиллар билан қўлга олинган.

Аниқланишича, У.Ш. ҳеч қандай «Л» исмли шахсни танимаслиги, С.Б.нинг пулини қўлга киритиш мақсадида овозини ўзгартириб, унга ўзини «Л» деб таништириб, бошқа рақам орқали телефонда гаплашиб келган. С.Б.ни Миллий гвардия тизимига ишга киритаман деб алдаб, 27 минг 200 доллар пулни қўлга киритган ва шахсий эҳтиёжи учун сарфлаб юборган.

Мазкур ҳолат юзасидан Каттақўрғон туман ИИБ ҳузуридаги Тергов бўлими томонидан Жиноят кодексининг 168-моддаси 4-қисми «а» банди (жуда кўп миқдорда фирибгарлик) ва 28, 211-моддаси 3-қисми «а» банди (жуда кўп миқдорда пора бериш) билан жиноят иши қўзғатилиб, дастлабки тергов ҳаракатлари олиб борилмоқда.