18 август куни ижтимоий тармоқларда Қўқон шаҳри кўчалари исириқ ёрдамида дезинфекцияси қилинаётгани тасвирланган видео тарқалганди. Қўқон шаҳр ҳокимлиги матбуот хизмати ушбу ҳолат бўйича изоҳ берди.
Қўқон шаҳар «Тоза ҳудуд» ДУК томонидан берилган маълумотга кўра, корхона ходимлари шаҳар ва шаҳар атрофидаги маиший чиқиндиларни йиғиб олишлари давомида маиший чиқиндилар билан бирга олинган чўғланган исириқ қолдиқларини ўчириш мақсадида автомашина ҳаракатланаётганда бир-бирига ҳазил қилиб, ўйнашиб, ўзларини кўрсатиш учун исириқ тўлиқ ёниб тугагунча йўл-йўлакай тутатиб кетган.
«Уларнинг бу хатти-ҳаракатлари шаҳарда олиб борилаётган коронавирусга қарши дезинфекция ишлари билан боғлиқ эмас. Қўқон шаҳар ҳокимлиги ёки бошқа мутасаддилар томонидан мазкур ҳолат бўйича ҳеч қандай кўрсатма берилмаган», — дейилади хабарда.
Эслатиб ўтамиз, март ойида Ўзбекистон Соғлиқни сақлаш вазирилиги ҳузуридаги Санитария-эпидемиологик осойишталик агентлиги раҳбари Баҳром Алматов (ҳозирда агентлик директори ўринбосари) коронавирусдан ҳимояланиш учун уй шароитида исириқдан кўпроқ фойдаланишни тавсия қилган эди. Олий Мажлис Сенатининг февраль ойи охирида бўлиб ўтган иккинчи ялпи мажлисида ташриф буюрувчиларнинг иситмаси бор-йўқлиги тепловизорлар ёрдамида текширилгани, кириш жойида қўриқчилардан бири бинони исириқ билан тутатгани ҳақида хабар берилганди.
Изоҳ (0)