Ўзбекистонда 1 сентябрдан бошлаб ҳожатхоналар билан таъминланмаган АЁҚШларга нефть маҳсулотлари ва газ етказиб бериш, шунингдек, уларнинг лицензиялари муддати ҳам тўхтатилиши мумкин. Бу ҳақда Туризмни ривожлантириш давлат қўмитаси матбуот хизмати хабар қилган.
Вазирлар Маҳкамасининг 2019 йил 21 сентябрдаги «Йўлбўйи ва туристик инфратузилмани янада ривожлантириш чора-тадбирлари тўғрисида»ги қарорига мувофиқ, 2020 йил 1 мартдан бошлаб жамоат мақсадларига мўлжалланган ва кеча-кундуз ишлайдиган, санитария, шаҳарсозлик нормалари ва қоидалари талабларига жавоб берадиган санитария-гигиена шохобчалари билан жиҳозланмаган автомобилларга газ тўлдириш компрессор станциялари (АГТКС), автомобилларга газ қуйиш станциялари (АГҚС) ва автомобилларга ёқилғи қуйиш станциялари (АЁҚШ)нинг фаолият кўрсатишига йўл қўйилмаслиги белгиланган.
Коронавирус пандемияси шароитида туризм ҳамда унга бевосита боғлиқ бўлган тармоқларни қўллаб-қувватлаш мақсадида Вазирлар Маҳкамаси 2020 йил 10 июлда 433-сон қарорни қабул қилган. Унда 2020 йилнинг 1 сентябридан санитария-гигиена шохобчалари билан жиҳозланмаган АГТКС, АГҚС ва АЁҚШларнинг фаолият кўрсатишига йўл қўйилмаслиги белгиланган.
АГТКС, АГҚС ва АЁҚШ ҳудудлари санитария, шаҳарсозлик нормалари ва қоидалари талабларига жавоб берадиган санитария-гигиена шохобчалари билан жиҳозланмаса, шунингдек, Республика ва Ҳудудий ишчи гуруҳ аъзолари томонидан аниқланган камчиликлар 2020 йилнинг 1 сентябрига қадар бартараф этилмаса, у ҳолда:
- «Ўзтрансгаз» АЖ ва «Ҳудудгазтаъминот» АЖ ҳудудий бўлинмалари томонидан — АГТКСларга газ етказиб бериш;
- «Ўзбекнефтгаз» АЖ ҳудудий нефть базалари томонидан — аниқланган камчиликлар тўлиқ бартараф этилмагунича АЁҚШларга нефть маҳсулотлари етказиб беришни вақтинча тўхтатиш ёки Вазирлар Маҳкамасининг 1998 йил 18 сентябрдаги «Автомобиль ёнилғиси қуйиш шохобчаларининг ишини такомиллаштириш ва республика истеъмолчиларини нефть маҳсулотлари билан таъминлашни яхшилаш чора-тадбирлари тўғрисида»ги 397-сонли қарори талабларига мувофиқ нефть маҳсулотлари етказиб бериш шартномаси бекор қилиш;
- Нефть, газ ҳамда газ конденсатини қазиб чиқариш, қайта ишлаш ва сотиш, магистрал газ қувурлари, нефть қувурлари ва нефть маҳсулотлари қувурларини лойиҳалаштириш, қуриш, улардан фойдаланиш ва уларни таъмирлаш бўйича фаолиятни лицензиялаш комиссияси томонидан — лицензия талаблари ва шартлари белгиланган тартибда бажарилмаганлиги муносабати билан АГТКС ва АЁҚШлар орқали сиқилган ва суюлтирилган газни сотиш фаолиятини амалга ошириш лицензиясининг амал қилишини тўхтатилишига олиб келиши мумкин.
Изоҳ (0)