Самарқандлик 19 ёшли қиз уч ёшли Эъзозани даволаш учун берилган 25 млн сўмлик хайрия пулларини ўзлаштиришга уринди

Тошкент вилояти ИИББ 1-минтақавий ҳудуд мувофиқлаштириш маркази ходимлари томонидан ўтказилган тезкор тадбир давомида Telegram’да хайрия учун деб 10 миллион сўм ва 1400 АҚШ доллари миқдоридаги пулларни фирибгарлик йўли билан ўзлаштираётган шахс Самарқанд шаҳрида қўлга олинди.

13 август куни Тошкент вилояти ИИББ 1-минтақавий ҳудуд бошлиғи номига Чирчиқ шаҳрида яшовчи Эъзозанинг отаси фуқаро Э.Гулметов ариза билан мурожаат қилган. У ўз аризасида нўмалум аёл унинг қизи Эъзозага тегишли бўлган маълумотларни ўзлаштириш орқали Telegram’да ташкил этилган «Эъзозага ёрдам» гуруҳида ўзини гўёки қизнинг онаси деб таништириб, фирибгарлик йўли билан хайрия пулларини ўзлаштираётгани ҳақида баён қилиб, унга тегишли чора кўришни сўраган.

Ҳолат юзасидан ИИББ тезкор ходимлари томонидан олиб борилган суруштирувлар давомида ушбу аёлнинг Эъзозага ёки унинг яқин қариндошларига ҳеч қандай алоқаси йўқлиги аниқланган ва жиноятни барвақт олдини олиш мақсадида тезкор тадбир ташкил этилган.

Тадбирга ўз ихтиёри билан кўмаклашишга розилик билдирган Эъзозанинг отаси интернетдаги номаълум аёл билан шартли равишда «саховатли инсон» бўлиб телефон орқали мулоқотга киришган. Шунда, аёл Эъзозанинг онаси эканлигини ва қизчанинг кунлик муолажалари учун зудлик билан 25 миллион сўм пул зарурлигини, унинг аҳволи оғирлигини ва ўзи Самарқанд вилоятида эканлигини айтиб, хайрия пулларини олиш учун Тошкент шаҳрида ички ишлар ходими бўлиб ишловчи танишини юборишини айтган.

Шундан сўнг, тадбирга ИИВ ЎХБ Тошкент вилояти бўйича бўлими ходимлари ҳам жалб этилган ва соат 17:30 ларда белгиланган жойга келиб «саховатли инсон»га ўзини Шавкат деб таништирган фуқаро хайрия сифатида берилаётган келишилган пулларни олаётган вақтида тадбир қатнашчилари томонидан далилий ашёлар билан ушланган.

Маълум бўлишича, ушбу фуқаро аслида 1981 йилда Самарқанд шаҳрида туғилган, Самарқанд—Тошкент йўналишида йўловчи ташиш билан шуғулланувчи Шавкат Б. эканлиги ва бирон-бир ҳуқуқни муҳофаза қилувчи органда хизмат қилмаслиги аниқланган.

Ушланган шахс билан ўтказилган суҳбат давомида унга номаълум аёл қўнғироқ қилиб, Тошкент шаҳрида 10 миллион сўм ва 1400 АҚШ доллари миқдоридаги пуллари борлигини, фақат пулни олаётган одамига ўзини ИИО ходими деб таништиришини илтимос қилганлигини ва бунинг эвазига 200 минг сўм почта пули олишга келишганини маълум қилган.

Ҳайдовчи Шавкат Б. ўз ихтиёри билан тезкор тадбирни давом эттиришга розилик билдирган.

14 август куни Самарқанд шаҳрида тезкор тадбир давом эттирилиб, фирибгарликда гумонланувчи аёл ҳайдовчи Шавкатдан келишилган пулларни олаётган вақтида тадбир иштирокчилари томонидан ашёвий далиллар билан қўлга олинган.

Фирибгарликда гумонланган шахс 2001 йилда туғилган, турмушга чиқмаган Самарқанд шаҳрида яшовчи М.М. эканлиги аниқланган. Ўтказилган суҳбат давомида, у Telegram’да фаол эканлиги ва бир биридан фарқ қилувчи 8 та профилдан фойдаланиши уларнинг 4 таси АҚШ рақамларидан очилганлиги маълум бўлган.

Ҳозирда мазкур ҳолат юзасидан, фуқаро М.М.га нисбатан Қибрай тумани ИИБ ТБ томонидан Жиноят кодексининг 168-моддаси 2-қисми «а» банди (фирибгарлик) билан жиноят иши қўзғатилган. Дастлабки тергов ҳаракатлари олиб борилмоқда.