Samarqand viloyatida ikki kishini o‘qishga kiritib qo‘yishni va’da qilgan ikki shaxs qo‘lga olindi. Bu haqda “Daryo”ga Davlat xavfsizlik xizmati xabar qildi.

Qayd etilishicha, DXX Samarqand viloyati boshqarmasi va viloyat ichki ishlar boshqarmasi hamkorligida o‘tkazilgan tezkor tadbir davomida Samarqand davlat universiteti xodimi va 2020/2021-o‘quv yili uchun qabul komissiyasi a’zosi bo‘lgan katta o‘qituvchi ikki kishini o‘qishga kiritib qo‘yish uchun 6 ming AQSh dollari olayotgan vaqtida ushlandi.

Hozirda aniqlangan barcha holatlar yuzasidan Jinoyat kodeksining tegishli moddalariga asosan jinoyat ishi qo‘zg‘atilib, tergov harakatlari doirasida ushbu noqonuniy ishlarga aloqador bo‘lgan shaxslarni aniqlash bo‘yicha tegishli chora-tadbirlar amalga oshirilmoqda.

Avvalroq Piskentda pedagogika universitetiga o‘qishga kiritish uchun 3,5 ming dollar olgan o‘qituvchi, Nukus davlat pedagogika institutiga o‘qishga kiritib qo‘yish uchun 3 ming dollar olgan dekan o‘rinbosari, Toshkentda konservatoriyaga o‘qishga kiritish uchun 5 ming dollar olgan o‘qituvchi, Toshkent davlat agrar universiteti Andijon filialiga 2 ming dollarga o‘qishga kiritib qo‘ymoqchi bo‘lgan sobiq o‘qituvchi, Namanganda universitetga o‘qishga kiritishni va’da qilib, 2,5 ming dollar va 5 mln so‘m talab qilgan firibgar o‘qituvchi qo‘lga tushgani haqida xabarlar berilgan edi.