Samarqandda Milliy gvardiyaga ishga kiritib qo‘yishni va’da qilib, 27 ming dollarini o‘zlashtirgan fuqaroga jinoyat ishi qo‘zg‘atildi

Samarqand viloyatida Milliy gvardiyaga ishga kiritib qo‘yishni va’da qilib, o‘zganing 27 ming 200 dollar miqdoridagi pullarni qo‘lga kiritgan fuqaro firibgarlikda ayblanmoqda. Bu haqda “Daryo”ga viloyat IIB axborot xizmati ma’lum qildi.Ma’lumot berilishicha, 2020-yilning 17-avgust kuni 20 yoshli fuqaro S.B. Samarqand viloyat IIBga ariza bilan murojaat qilib, Urgut tumanida yashovchi tanishi U.Sh. uni Milliy gvardiyaning Samarqand viloyat boshqarmasiga ishga joylashtirib qo‘yishini aytganini, ammo aldab kelganini ma’lum qilgan.Shikoyatchi S.B. 2020-yilning yanvar oyidan iyul oyi oxiriga qadar tanishi U.Sh.ga 27 ming 200 dollar pul berganini, evaziga U.Sh. Milliy gvardiyaning viloyat boshqarmasida ishlovchi yuqori lavozimli “L” ismli tanishi orqali uni Milliy gvardiyaga ishga joylab qo‘yishini va’da qilganini ma’lum qilgan. Shuningdek, 27 ming 200 dollar pulni olgan tanishi ishni bajarish uchun yana 300 dollar so‘rayotganini bayon qilgan. Hamda U.Sh. va “L” ismli shaxslarga nisbatan qonuniy chora ko‘rishni so‘ragan.Fuqaro S.B.ning arizasiga asosan 2020-yil 17-avgust kuni Samarqand viloyat IIB JQB Korrupsiya va iqtisodiy jinoyatlarga qarshi kurashish bo‘limi, Kattaqo‘rg‘on tuman IIB huzuridagi Tergov bo‘limi va Milliy gvardiyaning Samarqand viloyat boshqarmasi xodimlari hamkorligida tezkor tadbir o‘tkazilgan. Tadbirda Urgut shahrida yashovchi 22 yoshli U.Sh. ariza muallifi S.B.dan 300 dollar pulni olgan vaqtda ashyoviy dalillar bilan qo‘lga olingan.Aniqlanishicha, U.Sh. hech qanday “L” ismli shaxsni tanimasligi, S.B.ning pulini qo‘lga kiritish maqsadida ovozini o‘zgartirib, unga o‘zini “L” deb tanishtirib, boshqa raqam orqali telefonda gaplashib kelgan. S.B.ni Milliy gvardiya tizimiga ishga kiritaman deb aldab, 27 ming 200 dollar pulni qo‘lga kiritgan va shaxsiy ehtiyoji uchun sarflab yuborgan.Mazkur holat yuzasidan Kattaqo‘rg‘on tuman IIB huzuridagi Tergov bo‘limi tomonidan Jinoyat kodeksining 168-moddasi 4-qismi “a” bandi (juda ko‘p miqdorda firibgarlik) va 28, 211-moddasi 3-qismi “a” bandi (juda ko‘p miqdorda pora berish) bilan jinoyat ishi qo‘zg‘atilib, dastlabki tergov harakatlari olib borilmoqda.