Янгийўлдаги марказий шифохона юқумли касалликлар бўлимининг ночор аҳволдалиги юзасидан раддия эълон қилинди

Тошкент вилояти ҳокимлиги ахборот хизмати «Янгийўл тумани Тиббиёт бирлашмаси марказий шифохонаси юқумли касалликлар бўлимининг ҳолати ночор аҳволда ва дори-дармонлар берилмаяпти» деган мазмунда тиббиёт ходимлари томонидан ижтимоий тармоққа видео юкланган видео юзасидан раддия эълон қилди.

«Аслида юқумли касалликлар бўлими ҳозирги кунда маънан эскирган, яъни 1975 йилда қурилган бинода фаолият юритиб келмоқда. Ушбу масала 2018 йилда Президент ташрифи чоғида кўтарилган, юқумли касалликлар бўлими биноси яроқсизлиги туфайли Янгийўл шаҳар Тошкент шоҳкўчаси 56-уй манзилидаги 4 қаватли замонавий бинони капитал реконструкция қилиб, кўчириб ўтказиш режалаштирилганди.

Ушбу бинода таъмирлаш ва монтаж ишлари 98 фоизга якунланган, атрофи ободонлаштирилган. Ҳар бир бемор учун кислород трубкалари монтаж қилинган. Лифтлар ўрнатилган. Фасад ва том ёпиш ишлари тугалланган.

«Озода МРТ» МЧЖ томонидан бинонинг вентиляция тизимини ўрнатиш ва ишга тушириш (пусконаладка) ишлари олиб борилмоқда.

«Дори-дармон йўқ, берилмаяпти» деган жумлаларга келсак, юқумли касалликлар бўлими ходимлари ҳамда беморлар учун ички дорихона бўлимидан 2020 йил 27 июлдан бугунги кунга қадар 40 турдаги 30,6 миллион сўмлик дори-дармон ва бир марталик тиббий анжомлар берилган.

COVID-19 касаллигига қарши кураш учун Янгийўл туманида 3 ойлик дори-дармон захираси яратилган. Бўлим томонидан 2020 йил 13 августдан буён дори воситалари ёки тиббий анжомлар талаб қилиб, мурожаат этилмаганлигини билдирамиз», – дея Янгийўл туман Тиббиёт бирлашмаси бошлиғи Ж. Асатуллаев сўзларини келтирган ҳокимлик.

Интернетда тарқалган видеода Янгийўл шаҳар юқумли касалликлар шифохонасидаги аҳвол оғир экани, йўлаклар, ҳожатхоналар абгорлиги, беморларнинг аксар қисми пневмония билан касаллангани, дори-дармон, тиббиёт воситалари етишмаслиги, сув таъминотида муаммолар борлги, мутахассислар етишмаслиги, тиббиёт персоналига 6 фоизлик устамалар ва ойлик маошлар вақтида тўланмаётгани таъкидланган.

Аввал Соғлиқни сақлаш вазирлиги интернетда Тошкент шаҳар 3-сонли юқумли касалликлар шифохонаси ходимларининг муассаса фаолиятини қайта тиклаш ва тегишли тўловларни тўлаб бериш билан боғлиқ видеомурожаатида қайд этилган вазият ўрганилганини билдирганди.