Қашқадарё вилоятининг Ғузор туманидаги коллежда камбағал ва ишсиз фуқароларни касб-ҳунарга ўргатувчи ўқув курси ташкил этилган бўлиб, биринчи машғулотни туман ҳокими Бекзод Суюновнинг ўзи ўтган. Бу ҳақда «Дарё»га ҳокимлик ахборот хизмати раҳбари Худойберди Йўлдошев хабар берди.
Таъкидланишича, тумандаги камбағал ва ишсиз фуқароларни ўқитиш амалиёти Президентнинг «Камбағал ва ишсиз фуқароларни тадбиркорликка жалб қилиш, уларни меҳнат фаолиятини ошириш ва касб-ҳунарга ўқитишга қаратилган ҳамда аҳоли бандлигини таъминлашга оид қўшимча чора-тадбирлари тўғрисида»ги қарори ижросини таъминлаш мақсадида амалга оширилган.
«Мамлакатимизда эҳтиёжманд оилаларга субсидия асосида бепул иссиқхоналар қуриб бериш, шунингдек, ‘Ҳар бир оила тадбиркор’ дастури доирасида имтиёзли кредит асосида иссиқхоналар барпо этиш ишлари амалга оширилмоқда. Бироқ жойларда ўтказилган мониторинг натижаси айрим хонадон эгалари иссиқхонадан фойдаланиш тартиби ва мавсумга қараб қайси экинни қачон экишни билмаслиги сабаб иссиқхоналар фаолиятида самарадорлик сезилмаётгани маълум бўлди. Шу боисдан ҳам туман ҳокими ташаббуси билан тумандаги Қишлоқ хўжалиги коллежида махсус аудиториялар ташкил этилиб, касб-ҳунарга ўқитиш курси очилди», — дейди ҳокимлик ахборот хизмати раҳбари Худойберди Йўлдошев.
Худойберди Йўлдошевнинг маълумот беришича, ҳоким иштирокидаги биринчи машғулот 2020 йил 17 август куни бўлиб ўтган бўлиб, машғулотда иккита гуруҳда жамланган 40 нафар фуқаро иштирок этган.
Қўшимча қилинишича, камбағал ва ишсиз фуқароларга мўлжалланган ўқув машғулотларида иссиқхоналардан фойдаланиш тартиби ва уларнинг агротехникаси ҳақида билим берилади. Ва ўқув машуғотда қатнашган фуқароларга муайян миқдорда пул маблағлари ҳам тўлаб берилади.
Изоҳ (0)