Қозоғистон пойтахти Нур-Султон шаҳрида мамлакатнинг биринчи президенти Нурсултон Назарбоевнинг ҳайкали очилди. Бу ҳақда «РИА Новости» хабар берди.
Маълум қилинишича, Қозоғистон президенти Қосим-Жўмарт Тўқаев ҳайкалнинг очилиш маросимида онлайн режимда иштирок этган. Мамлакат биринчи президентига бағишланган монумент Мудофаа миллий университети ҳудудига ўрнатилган. Қозоғистоннинг собиқ президенти 6 июль куни 80 ёшни қарши олади.
Тўқаев ўз чиқишида Назарбоев замонавий Қозоғистоннинг асосчиси эканлигини таъкидлаган.
Президентнинг қўшимча қилишича, монументнинг Мудофаа миллий университетида ўрнатилишининг рамзий маъноси бор, чунки Қозоғистон қуролли кучлари Назарбоевнинг фармони билан ташкил қилинган.
Эслатиб ўтамиз, 2 июль куни Нурсултон Назарбоев коронавирусдан тузалгани маълум қилинди.
Нурсултон Назарбоевнинг коронавирусга чалингани ҳақида 18 июнь куни маълум бўлганди. Шундан сўнг, Ўзбекистон Президенти Шавкат Мирзиёев Назарбоевга мактуб йўллаб, унинг тез орада тузалиб кетишини тилаганди. Кейинроқ Шавкат Мирзиёев телефон орқали Нурсултон Назарбоевнинг ҳолидан хабар олганди. Коронавирусга чалингани сабабли Нурсултон Назарбоев Москвада 24 июнь куни бўлиб ўтган Ғалаба парадида иштирок эта олмади.
Аввалроқ Туркманистон президенти Гурбангули Бердимуҳамедов пайғамбар ёшини нишонлаганди.
Изоҳ (0)