O‘zbekiston Prezidenti Shavkat Mirziyoyev 22-iyun kuni Qozog‘istonning birinchi prezidenti – Elboshi Nursulton Nazarboyev bilan telefon orqali muloqot qildi. Bu haqda Prezident matbuot xizmati xabar berdi.

Foto: Prezident matbuot xizmati

Ma’lum qilinishicha, suhbat avvalida O‘zbekiston Prezidenti Shavkat Mirziyoyev Elboshi Nursulton Nazarboyevga tez orada tuzalib ketishini, mustahkam sog‘lik va kuch-quvvat tiladi.

Muloqotda koronavirus infeksiyasi tarqalishining oldini olish, shuningdek, O‘zbekiston va Qozog‘istonning jadal rivojlanib borayotgan ikki tomonlama munosabatlari va iqtisodiyotlariga pandemiya oqibatlarining salbiy ta’sirini kamaytirish borasida ikki mamlakat hukumatlari tomonidan birgalikda ko‘rilayotgan chora-tadbirlar muhokama qilindi. Bu boradagi sa’y-harakatlarni muvofiqlashtirishni yanada kuchaytirish muhim ekani ta’kidlandi.

“Ko‘p asrlik do‘stlik, yaxshi qo‘shnichilik va strategik sheriklik tamoyillariga asoslangan O‘zbekiston—Qozog‘iston amaliy hamkorligi kengayib borayotgani mamnuniyat bilan qayd etildi. O‘zaro manfaatli aloqalarning ustuvor yo‘nalishlarida qo‘shma loyihalar amalga oshirilmoqda. O‘ndan ortiq yangi loyihani amalga oshirish nazarda tutilayotgan sanoat kooperatsiyasini mustahkamlash bo‘yicha “yo‘l xaritasi” ma’qullandi”, — deyiladi xabarda.

Qayd etilishicha, bo‘lajak uchrashuv va tadbirlar rejasi yuzasidan ham fikr almashildi. Muloqot so‘ngida ikki davlat yetakchilari O‘zbekiston va Qozog‘iston xalqlariga tinchlik, farovonlik va ravnaq tiladi.

Eslatib o‘tamiz, Nursulton Nazarboyevning koronvirusga chalingani ma’lum bo‘lgach, Shavkat Mirziyoyev unga maktub yo‘llab, koronavirusdan tezroq tuzalishni tilagandi.

Avvalroq Qozog‘iston sog‘liqni saqlash vaziri Yeljan Birtanovda hamda Olmaota viloyati hokimi Omondiq Batalovda koronavirus aniqlangani haqida xabar berilgandi.

So‘nggi ma’lumotlarga ko‘ra, Qozog‘istonda koronavirusga chalinganlar soni 17 732 kishiga yetgan. Hozirga qadar 10 897 kishi sog‘aygan, 120 kishi virus qurboniga aylangan