АҚШ Сенати Гонконгда миллий хавфсизликни таъминлаш тўғрисидаги қонун қабул қилгани туфайли Хитойга қарши санкциялар тўғрисидаги ҳужжат лойиҳасини қабул қилди. Бу ҳақда «USA Today» хабар бермоқда.
Ҳужжатда миллий хавфсизлик тўғрисидаги қонуннинг Гонконгга татбиқ этилиши билан боғлиқ Хитой расмийлари билан иш олиб борувчи банклар ва компанияларга нисбатан санкциялар назарда тутилган.
Таъкидланишича, қонун лойиҳаси бир овоздан қабул қилинди. Бунгача у Вакиллар палатаси томонидан маъқулланган эди. Энди ҳужжат президент Дональд Трамп томонидан имзоланиши керак.
Эслатиб ўтамиз, 30 июнь куни Гонконгда миллий хавфсизлик тўғрисидаги қонун кучга кирди. Мақсад ички низо, терроризм ва ташқи кучларнинг маъмурий минтақа ишларига аралашишининг олдини олишга қаратилган.
Қонунда Хитойнинг миллий хавфсизлигига таҳдид солувчи куч, сепаратизм, террористик ҳужум ва хорижий кучлар билан тил бириктириш учун умрбод қамоқ жазоси кўзда тутилган. Гонконгда қонунни амалга ошириш учун улар Хитой давлат хавфсизлик органларининг ваколатхоналарини очадилар.
Май ойида Пекин қонун лойиҳасини эълон қилган эди. Шундан сўнг Гонконгда оммавий намойишлар ва тартибсизликлар бошланди. Вашингтонда бу ташаббус Пекиннинг Гонконг мақомини пасайтиришга қаратилган ҳаракати деб номланди ва санкциялар билан жавоб беришга ваъда берди.Июнь ойи охирида АҚШ Давлат департаменти Гонконг миллий хавфсизлик тўғрисидаги қонуни қабул қилинишида иштирок этган юқори мартабали хитойлик амалдорларга АҚШ визаларини беришни чеклади.
Изоҳ (0)