Скандинавия давлатларининг шимолий қисмидаги Россия билан чегарадош ҳудудларда радиация даражасининг ортиши ядровий реакторда амалга оширилган ишлар билан боғлиқ бўлиши мумкин. Бу ҳақда Халқаро атом энергияси агентлиги (МАГАТЭ) маълум қилди.
«Яқинда Шимолий Европада топилган радиоизотоплар даражасининг оз миқдорда ошиши, тахминларга кўра, ядровий реакторнинг ишига ёки унга кўрсатилаётган техник хизматга боғлиқ бўлиши мумкин», — дейилади хабарда.
Агентликнинг аниқлик киритишича, реакторга техник хизмат кўрсатиш вақтида жуда оз миқдорда радиоактив моддалари ташқарига чиқиши мумкин. «Зарарли моддаларнинг географик жиҳатдан тарқалган жойи ҳали аниқланмади», — дейилади МАГАТЭ хабарида.
Таъкидланишича, кузатилаётган радиоактив зарралар концентрацияси инсон соғлиғи ва атроф-муҳит учун зарарсиз.
МАГАТЭнинг маълум қилишича, атмосферага радионуклидларнинг тарқалиш манбасини фақатгина зарарли чиқиндилар ҳавога чиқиб кетган мамлакат бу ҳақида маълумот берсагина аниқлаш мумкин.
Эслатиб ўтамиз, июнь ойида Европанинг Россия билан чегарадош шимолий қисмида радиоактив моддалар даражаси ошиб кетгани аниқланган. Норвегия, Финляндия ва Швеция радиацион мониторинг датчиклари радиоактив моддалар даражаси бироз ошганини қайд этган. Бироқ «Росгидромет» Болтиқ денгизи ҳудудида радиоактив моддалар даражаси ошгани қайд этилмаганини маълум қилган. Уларнинг таъкидлашича, денгиздаги станцияларда гамма-нурланиш миқдори нормада. «Росэнергоатом» эса июнь ойида Ленинград ва Кола АЭСларида бирорта ҳолат қайд этилмаганини, станциялардан чиқаётган изотопларнинг умумий миқдори назорат қийматидан ошмаганини билдирган.
Изоҳ (0)